ಮೀನಾಕ್ಷೀಪಞ್ಚರತ್ನಮ್

. ಮೀನಾಕ್ಷೀಪಞ್ಚರತ್ನಮ್

            (ಶ್ರೀ ಶಂಕರಾಚಾರ್ಯಕೃತಮ್)

ಉದ್ಯದ್ಭಾನುಸಹಸ್ರಕೋಟಿಸದೃಶಾಂ ಕೇಯೂರಹಾರೋಜ್ಜ್ವಲಾಂ

ಬಿಮ್ಬೋಷ್ಠೀಂ ಸ್ಮಿತದನ್ತಪಙ್ಕ್ತಿರುಚಿರಾಂ ಪೀತಾಮ್ಬರಾಲಙ್ಕೃತಾಮ್ |

ವಿಷ್ಣುಬ್ರಹ್ಮಸುರೇನ್ದ್ರಸೇವಿತಪದಾಂ ತತ್ವಸ್ವರೂಪಾಂ ಶಿವಾಂ

ಮೀನಾಕ್ಷೀಂ ಪ್ರಣತೋಸ್ಮಿ ಸನ್ತತಮಹಂ ಕಾರುಣ್ಯ ವಾರಾಂನಿಧಿಮ್ || ೧ ||

ಮುಕ್ತಾಹಾರಲಸತ್ಕಿರೀಟರುಚಿರಾಂ ಪೂರ್ಣೇನ್ದುವಕ್ತ್ರಪ್ರಭಾಂ

ಶಿಞ್ಜನ್ನೂಪುರಕಿಙ್ಕಿಣೀಮಣಿಧರಾಂ ಪದ್ಮಪ್ರಭಾಭಾಸುರಾಮ್ |

ಸರ್ವಾಭೀಷ್ಟಫಲಪ್ರದಾಂ ಗಿರಿಸುತಾಂ ವಾಣೀರಮಾಸೇವಿತಾಂ

ಮೀನಾಕ್ಷೀಂ ಪ್ರಣತೋಸ್ಮಿ ಸನ್ತತಮಹಂ ಕಾರುಣ್ಯ ವಾರಾಂನಿಧಿಮ್ || ೨ ||

ಶ್ರೀವಿದ್ಯಾಂ ಶಿವವಾಮಭಾಗನಿಲಯಾಂ ಹ್ರೀಙ್ಕಾರಮನ್ತ್ರೋಜ್ಜ್ವಲಾಂ

ಶ್ರೀಚಕ್ರಾಙ್ಕಿತಬಿನ್ದುಮಧ್ಯವಸತಿಂ ಶ್ರೀಮತ್ಸಭಾನಾಯಿಕಾಮ್ |

ಶ್ರೀಮತ್ಷಣ್ಮುಖವಿಘ್ನರಾಜಜನನೀಂ ಶ್ರೀಮಜ್ಜಗನ್ಮೋಹಿನೀಂ

ಮೀನಾಕ್ಷೀಂ ಪ್ರಣತೋಸ್ಮಿ ಸನ್ತತಮಹಂ ಕಾರುಣ್ಯ ವಾರಾಂನಿಧಿಮ್ || ೩ ||

ಶ್ರೀಮತ್ಸುನ್ದರನಾಯಿಕಾಂ ಭಯಹರಾಂ ಜ್ಞಾನಾಪ್ರದಾಂ ನಿರ್ಮಲಾಂ

ಶ್ಯಾಮಾಭಾಂ ಕಮಲಾಸನಾರ್ಚಿತಪದಾಂ ನಾರಾಯಣಸ್ಯಾನುಜಾಮ್ |

ವೀಣಾವೇಣುಮೃದಙ್ಗವಾದ್ಯರಸಿಕಾಂ ನಾನಾವಿಧಾಮಮ್ಬಿಕಾಂ

ಮೀನಾಕ್ಷೀಂ ಪ್ರಣತೋಸ್ಮಿ ಸನ್ತತಮಹಂ ಕಾರುಣ್ಯ ವಾರಾಂನಿಧಿಮ್ || ೪ ||

ನಾನಾಯೋಗಿಮುನೀನ್ದ್ರಹೃತ್ಸುವಸತಿಂ  ನಾನಾರ್ಥಸಿದ್ಧಿಪ್ರದಾಂ

ನಾನಾಪುಷ್ಪವಿರಾಜಿತಾಙ್ಘ್ರಿಯುಗಲಾಂ ನಾರಾಯಣೇನಾರ್ಚಿತಾಮ್ |

ನಾದಬ್ರಹ್ಮಮಯೀಂ ಪರಾತ್ಪರತರಾಂ ನಾನಾರ್ಥತತ್ವಾತ್ಮಿಕಾಂ

ಮೀನಾಕ್ಷೀಂ ಪ್ರಣತೋಸ್ಮಿ ಸನ್ತತಮಹಂ ಕಾರುಣ್ಯ ವಾರಾಂನಿಧಿಮ್ || ೫ ||