ಶ್ರೀ ಅಮ್ಬಾಷ್ಟಕಮ್

ಶ್ರೀ ಅಮ್ಬಾಷ್ಟಕಮ್

       ( ಶ್ರೀ ಶಂಕರಾಚಾರ್ಯಕೃತಮ್)

 ಚಾಞ್ಚಲ್ಯಾರುಣಲೋಚನಾಞ್ಚಿತಕೃಪಾಂ ಚನ್ದ್ರಾರ್ಧಚೂಡಾಮಣಿಂ

ಚಾರುಸ್ಮೇರಮುಖಾಂ ಚರಾಚರಜಗತ್ಸಂರಕ್ಷಣೇ ತತ್ಪರಾಮ್ |

ಚಞ್ಚಚ್ಚಮ್ಪಕನಾಸಿಕಾಗ್ರವಿಲಸನ್ಮುಕ್ತಾಮಣೀರಞ್ಜಿತಾಂ

ಶ್ರೀಶೈಲಸ್ಥಲವಾಸಿನೀಂ ಭಗವತೀಂ ಶ್ರೀಮಾತರಂ ಭಾವಯೇ || ೧ ||

ಕಸ್ತೂರೀತಿಲಕಾಞ್ಚಿತೇನ್ದುವಿಲಸತ್ಪ್ರೋದ್ಭಾಸಿಫಾಲಸ್ಥಲೀಂ

ಕರ್ಪೂರದ್ರವಮಿಶ್ರಚೂರ್ಣಖದಿರಾಮೋದೋಲ್ಲಸದ್ವೀಟಿಕಾಮ್ |

ಲೋಲಾಪಾಙ್ಗತರಙ್ಗಿತೈರಧಿಕೃಪಾಸಾರೈರ್ನತಾನನ್ದಿನೀಂ

ಶ್ರೀಶೈಲಸ್ಥಲವಾಸಿನೀಂ ಭಗವತೀಂ ಶ್ರೀಮಾತರಂ ಭಾವಯೇ || ೨ ||

ರಾಜನ್ಮತ್ತಮರಾಲಮನ್ದಗಮನಾಂ ರಾಜೀವಪತ್ರೇಕ್ಷಣಾಂ

ರಾಜೀವಪ್ರಭವಾದಿದೇವಮಕುಟಾರಾಜತ್ಪದಾಂಭೋರುಹಾಮ್ |

ರಾಜೀವಾಯತಪತ್ರಮಣ್ಡಿತಕುಚಾಂ ರಾಜಾಧಿರಾಜೇಶ್ವರೀಂ

ಶ್ರೀಶೈಲಸ್ಥಲವಾಸಿನೀಂ ಭಗವತೀಂ ಶ್ರೀಮಾತರಂ ಭಾವಯೇ || ೩ ||

ಷಟ್ಕೋಣಾಙ್ಗಣದೀಪಿಕಾಂ ಶಿವಸತೀಂ ಷಡ್ವೈರಿವರ್ಗಾಪಾಹಾಂ

ಷಟ್ಚಕ್ರಾನ್ತರಸಂಸ್ಥಿತಾಂ ವರಸುತಾಂ ಷಡ್ಯೋಗಿನೀವೇಷ್ಟಿತಾಮ್ |

ಷಟ್ಚಕ್ರಾಞ್ಚಿತಪಾದುಕಾಞ್ಚಿತಪದಾಂ ಷಡ್ಭಾವಗಾಂ ಷೋಡಶೀಂ

ಶ್ರೀಶೈಲಸ್ಥಲವಾಸಿನೀಂ ಭಗವತೀಂ ಶ್ರೀಮಾತರಂ ಭಾವಯೇ || ೪ ||

ಶ್ರೀನಾಥಾಕೃತಿಪಾಲಿತತ್ರಿಭುವನಾಂ ಶ್ರೀಚಕ್ರಸಞ್ಚಾರಿಣೀಂ

ಜ್ಞಾನಾಸಕ್ತಮನೋಜಯೌವನಲಸತ್ ಗನ್ಧರ್ವಕನ್ಯಾವೃತಾಮ್ |

ದೀನಾನಾಮತಿವೇಲಭಾಗ್ಯಕಲನೀಂ ದಿವ್ಯಾಮ್ಬರಾಲಙ್ಕೃತಾಂ

ಶ್ರೀಶೈಲಸ್ಥಲವಾಸಿನೀಂ ಭಗವತೀಂ ಶ್ರೀಮಾತರಂ ಭಾವಯೇ || ೫ ||

ಲಾವಣ್ಯಾಧಿಕಭೂಷಿತಾಙ್ಗಲತಿಕಾಂ ಲಾಕ್ಷಾರಸದ್ರಾವಿಣೀಂ

ಸೇವಾಯಾತಸಮಸ್ತದೇವವನಿತಾಂ ಸೀಮನ್ತಭೂಷಾನ್ವಿತಾಮ್ |

ಭಾವೋಲ್ಲಾಸವಶೀಕೃತಪ್ರಿಯತಮಾಂ ಭಣ್ಡಾಸುರಚ್ಛೇದಿನೀಮ್

ಶ್ರೀಶೈಲಸ್ಥಲವಾಸಿನೀಂ ಭಗವತೀಂ ಶ್ರೀಮಾತರಂ ಭಾವಯೇ || ೬ ||

ಧನ್ಯಾಂ ಸೋಮವಿಭಾವನೀಯಚರಿತಾಂ ಧಾರಾಧರಶ್ಯಾಮಲಾಂ

ಮಾನ್ಯಾರಾಧನಮೇದಿನೀಂ ಸುಮನಸಾಂ ಮುಕ್ತಿಪ್ರದಾನವ್ರತಾಮ್ |

ಕನ್ಯಾಪೂಜನಸುಪ್ರಸನ್ನಹೃದಯಾಂ ಕಾಞ್ಚೀಲಸನ್ಮಧ್ಯಮಾಂ

ಶ್ರೀಶೈಲಸ್ಥಲವಾಸಿನೀಂ ಭಗವತೀಂ ಶ್ರೀಮಾತರಂ ಭಾವಯೇ || ೭ ||

ಕರ್ಪೂರಾಗರುಕುಙ್ಕುಮಾಙ್ಕಿತಕುಚಾಂ ಕರ್ಪೂರವರ್ಣಸ್ಥಿತಾಂ

ಕೃಷ್ಟೋತ್ಕೃಷ್ಟಸುಕೃಷ್ಟಕರ್ಮದಹನಾಂ ಕಾಮೇಶ್ವರೀಂ ಕಾಮಿನೀಮ್ |

ಕಾಮಾಕ್ಷೀಂ ಕರುಣಾರಸಾರ್ದ್ರಹೃದಯಾಂ ಕಲ್ಪಾನ್ತರಸ್ಥಾಯಿನೀಂ

ಶ್ರೀಶೈಲಸ್ಥಲವಾಸಿನೀಂ ಭಗವತೀಂ ಶ್ರೀಮಾತರಂ ಭಾವಯೇ || ೮ ||

ಗಾಯತ್ರೀಂ ಗರುಡಧ್ವಜಾಂ ಗಗನಗಾಂ ಗಾನ್ಧರ್ವಗಾನಪ್ರಿಯಾಂ

ಗಂಭೀರಾಂ ಗಜಗಾಮಿನೀಂ ಗಿರಿಸುತಾಂ ಗನ್ಧಾಕ್ಷತಾಲಂಕೃತಾಮ್ |

ಗಂಗಾಗೌತಮಗರ್ಗಸನ್ನುತಪದಾಂ ಗಾಂ ಗೌತಮೀಂ ಗೋಮತೀಂ

ಶ್ರೀಶೈಲಸ್ಥಲವಾಸಿನೀಂ ಭಗವತೀಂ ಶ್ರೀಮಾತರಂ ಭಾವಯೇ || ೯ ||