. ಶ್ರೀ ದುರ್ಗಾದೇವೀಧ್ಯಾನಮ್

. ಶ್ರೀ ದುರ್ಗಾದೇವೀಧ್ಯಾನಮ್

      (ಬ್ರೂಹನ್ನನ್ದಿಕೇಶ್ವರಪುರಾಣಾಂತರ್ಗತಮ್)

ಓಂ ಜಟಾಜೂಟಸಮಾಯುಕ್ತಾಮರ್ದ್ಧೇನ್ದುಕೃತಶೇಖರಾಮ್ |

ಲೋಚನತ್ರಯಸಂಯುಕ್ತಾಂ ಪೂರ್ಣೇನ್ದುಸದೃಶಾನನಾಮ್ || ೧ ||

ಅತಸೀಪುಷ್ಪವರ್ಣಾಭಾಂ ಸುಪ್ರತಿಷ್ಠಾಂ ಸುಲೋಚನಾಮ್ |

ನವಯೌವನಸಂಪನ್ನಾಂ ಸರ್ವಾಭರಣಭೂಷಿತಾಮ್ || ೨ ||

ಸುಚಾರುದಶನಾಂ ತದ್ವತ್ ಪೀನೋನ್ನತಪಯೋಧರಾಮ್ |

ತ್ರಿಭಙ್ಗಸ್ಥಾನಸಂಸ್ಥಾನಾಂ ಮಹಿಷಾಸುರಮರ್ದಿನೀಮ್ || ೩ ||

ಮೃಣಾಲಾಯತಸಂಸ್ಪರ್ಶದಶಬಾಹುಸಮನ್ವಿತಾಮ್ |

ತ್ರಿಶೂಲಂ ದಕ್ಷಿಣೇ ಧ್ಯೇಯಂ ಖಡ್ಗಂ ಚಕ್ರಂ ಕ್ರಮಾದಧಃ || ೪ ||

ತೀಕ್ಷ್ಣಬಾಣಂ ತಥಾ ಶಕ್ತಿಂ ದಕ್ಷಿಣೇನ ವಿಚಿನ್ತಯೇತ್ |

ಖೇಟಕಂ ಪೂರ್ಣಚಾಪಂ ಚ ಪಾಶಮಙ್ಕುಶಮೇವ ಚ || ೫ ||

ಘಣ್ಟಾಂ ವಾ ಪರಶುಂ ವಾಽಪಿ ವಾಮತಃ ಸನ್ನಿವೇಶಯೇತ್ |

ಅಧಸ್ತಾನ್ಮಹಿಷಂ ತದ್ವತ್ ವಿಶಿರಸ್ಕಂ ಪ್ರದರ್ಶಯೇತ್ || ೬ ||

ಶಿರಚ್ಛೇದೋದ್ಭವಂ ತದ್ವದ್ದಾನವಂ ಖಡ್ಗಪಾಣಿನಮ್ |

ಹೃದಿಶೂಲೇನ ನಿರ್ಭಿನ್ನಂ ನಿರ್ಯದಾನ್ತ್ರವಿಭೂಷಿತಮ್ || ೭ ||

ರಕ್ತಾರಕ್ತೀಕೃತಾಙ್ಗಞ್ಚ ರಕ್ತವಿಸ್ಫುರಿತೇಕ್ಷಣಮ್ |

ವೇಷ್ಟಿತಂ ನಾಗಪಾಶೇನ ಭ್ರುಕುಟೀಭೀಷಣಾನನಮ್ || ೮ ||

ಸಪಾಶವಾಮಹಸ್ತೇನ ಧೃತಕೇಶಞ್ಚ ದುರ್ಗಯಾ |

ವಮದ್ರುಧಿರವಕ್ತ್ರಂಚ ದೇವ್ಯಾಃ ಸಿಂಹಂ ಪ್ರದರ್ಶಯೇತ್ || ೯ ||

ದೇವ್ಯಾಸ್ತು ದಕ್ಷಿಣಂ ಪಾದಂ ಸಮಂ ಸಿಂಹೋಪರಿಸ್ಥಿತಮ್ |

ಕಿಞ್ಚಿದೂರ್ಧ್ವಂ ತಥಾ ವಾಮಮಙ್ಗುಷ್ಠಂ ಮಹಿಷೋಪರಿ || ೧೦ ||

[ಪ್ರಸನ್ನವದನಾಂ ದೇವೀಂ ಸರ್ವಕಾಮಫಲಪ್ರದಾಮ್ |

ಶತ್ರುಕ್ಷಯಕರೀಂ ದೇವೀಂ ದೈತ್ಯದಾನವದರ್ಪಹಾಮ್] || ೧೧ ||

ಸ್ತೂಯಮಾನಞ್ಚ ತದ್ರೂಪಮಮರೈಃ ಸನ್ನಿವೇಶಯೇತ್  || ೧೨ ||

ಉಗ್ರಚಣ್ಡಾ ಪ್ರಚಣ್ಡಾ ಚ ಚಣ್ಡೋಗ್ರಾ ಚಣ್ಡನಾಯಿಕಾ |

ಚಣ್ಡಾ ಚಣ್ಡವತೀ ಚೈವ ಚಣ್ಡರೂಪಾಽತಿಚಣ್ಡಿಕಾ || ೧೩ ||

ಆಭಿಃ ಶಕ್ತಿಭಿರಷ್ಟಾಭಿಃ ಸತತಂ ಪರಿವೇಷ್ಟಿತಾಮ್ |

ಚಿನ್ತಯೇತ್ ಜಗತಾಂ ಧಾತ್ರೀಂ ಧರ್ಮಕಾಮಾರ್ಥಮೋಕ್ಷದಾಮ್ || ೧೪ ||