ಜ್ಞಾನಪ್ರಸೂನಾಮ್ಬಿಕಾಸ್ತೋತ್ರಮ್

ಜ್ಞಾನಪ್ರಸೂನಾಮ್ಬಿಕಾಸ್ತೋತ್ರಮ್

ಮಾಣಿಕ್ಯಾನ್ಞ್ಚಿತಭೂಷಣಾಂ ಮಣಿರವಾಂ ಮಾಹೇನ್ದ್ರನೀಲೋಜ್ಜ್ವಲಾಂ

ಮನ್ದಾರದ್ರುಮಮಾಲ್ಯಭೂಷಿತಕಚಾಂ ಮತ್ತೇಭಕುಮ್ಭಸ್ತನೀಮ್ |

ಮೌಲಿಸ್ತೋಮನುತಾಂ ಮರಾಲಗಮನಾಂ ಮಾಧ್ವೀರಸಾನನ್ದಿನೀಂ

ಧ್ಯಾಯೇ ಚೇತಸಿ ಕಾಲಹಸ್ತಿನಿಲಯಾಂ ಜ್ಞಾನಪ್ರಸೂನಾಮ್ಬಿಕಾಮ್ || ೧ ||

ಶ್ಯಾಮಾಂ ರಾಜನಿಭಾನನಾಂ ರತಿಹಿತಾಂ ರಾಜೀವಪತ್ರೇಕ್ಷಣಾಂ

ರಾಜತ್ಕಾಞ್ಚನರತ್ನಭೂಷಣಯುತಾಂ ರಾಜ್ಯಪ್ರದಾನೇಶ್ವರೀಮ್ |

ರಕ್ಷೋಗರ್ವನಿವಾರಣಾಂ ತ್ರಿಜಗತಾಂ ರಕ್ಷೈಕಚಿನ್ತಾಮಣಿಂ

ಧ್ಯಾಯೇ ಚೇತಸಿ ಕಾಲಹಸ್ತಿನಿಲಯಾಂ ಜ್ಞಾನಪ್ರಸೂನಾಮ್ಬಿಕಾಮ್ || ೨ ||

ಕಲ್ಯಾಣೀಂ ಕರಿಕುಮ್ಭಭಾಸುರಕುಚಾಂ ಕಾಮೇಶ್ವರೀಂ ಕಾಮಿನೀಂ

ಕಲ್ಯಾಣಾಚಲವಾಸಿನೀಂ ಕಲರವಾಂ ಕನ್ದರ್ಪವಿದ್ಯಾಕಲಾಮ್ |

ಕಞ್ಜಾಕ್ಷೀಂ ಕಲಬಿನ್ದುಕಲ್ಪಲತಿಕಾಂ ಕಾಮಾರಿಚಿತ್ತಪ್ರಿಯಾಂ

ಧ್ಯಾಯೇ ಚೇತಸಿ ಕಾಲಹಸ್ತಿನಿಲಯಾಂ ಜ್ಞಾನಪ್ರಸೂನಾಮ್ಬಿಕಾಮ್ || ೩ ||

ಭಾವಾತೀತ ಮನಃಪ್ರಭಾವಭರಿತಾಂ ಬ್ರಹ್ಮಾಣ್ಡಭಾಣ್ಡೋದರೀಂ

ಬಾಲಾಂ ಬಾಲಕುರಙ್ಗನೇತ್ರಯುಗಲಾಂ ಭಾನುಪ್ರಭಾಭಾಸಿತಾಮ್ |

ಭಾಸ್ವತ್ಕ್ಷೇತ್ರರುಚಾಭಿರಾಮನಿಲಯಾಂ ಭವ್ಯಾಂ ಭವಾನೀಂ ಶಿವಾಂ

ಧ್ಯಾಯೇ ಚೇತಸಿ ಕಾಲಹಸ್ತಿನಿಲಯಾಂ ಜ್ಞಾನಪ್ರಸೂನಾಮ್ಬಿಕಾಮ್ || ೪ ||

ವೀಣಾಗಾನವಿನೋದಿನೀಂ ವಿಜಯಿನೀಂ ವೇತಣ್ಡಕುಮ್ಭಸ್ತನೀಂ

ವಿದ್ವದ್ವನ್ದಿತಪಾದಪದ್ಮಯುಗಲಾಂ ವಿದ್ಯಾಪ್ರದಾಂ ಶಂಕರೀಮ್ |

ವಿದ್ವೇಷಿಣ್ಯರಿಭಞ್ಜಿನೀಂ ಸ್ತುತಿಭವಾಂ ವೇದಾನ್ತವೇದ್ಯಾಂ ಶಿವಾಂ

ಧ್ಯಾಯೇ ಚೇತಸಿ ಕಾಲಹಸ್ತಿನಿಲಯಾಂ ಜ್ಞಾನಪ್ರಸೂನಾಮ್ಬಿಕಾಮ್ || ೫ ||

ನಾನಾಭೂಷಿತಭೂಷಣಾದಿವಿಮಲಾಂ ಲಾವಣ್ಯಪಾಥೋನಿಧಿಂ

ಕಾಞ್ಚೀಚಂಚಲಘಾಟಿಕಾ ಕಲರವಾಂ ಕಞ್ಜಾತಪತ್ರೇಕ್ಷಣಾಮ್ |

ಕರ್ಪೂರಾಗರುಕುಙ್ಕುಮಾಙ್ಕಿತಕುಚಾಂ ಕೈಲಾಸನಾಥಪ್ರಿಯಾಂ

ಧ್ಯಾಯೇ ಚೇತಸಿ ಕಾಲಹಸ್ತಿನಿಲಯಾಂ ಜ್ಞಾನಪ್ರಸೂನಾಮ್ಬಿಕಾಮ್ || ೬ ||

ಮನ್ಜೀರಾಞ್ಚಿತಪಾದಪದ್ಮಯುಗಲಾಂ ಮಾಣಿಕ್ಯಭೂಷಾನ್ವಿತಾಂ

ಮನ್ದಾರದ್ರುಮಮಞ್ಜರೀಮಧುಝರೀ ಮಾಧುರ್ಯಖೇಲತ್ಗಿರಾಮ್ |

ಮಾತಙ್ಗೀಂ ಮದಿರಾಲಸಾಂ ಕರಶುಕಾಂ ನೀಲಾಲಕಾಲಂಕೃತಾಂ

ಧ್ಯಾಯೇ ಚೇತಸಿ ಕಾಲಹಸ್ತಿನಿಲಯಾಂ ಜ್ಞಾನಪ್ರಸೂನಾಮ್ಬಿಕಾಮ್ || ೭ ||

ಕರ್ಣಾಲಮ್ಬಿತಹೇಮಕುಣ್ಡಲಯುಗಾಂ ಕಾದಮ್ಬವೇಣೀಮುಮಾಂ

ಅಮ್ಭೋಜಾಸನವಾಸವಾದಿವಿನುತಾಂ ಅರ್ದ್ಧೇನ್ದುಭೂಷೋಜ್ಜ್ವಲಾಮ್ |

ಕಸ್ತೂರೀತಿಲಕಾಭಿರಾಮನಿಟಿಲಾಂ ಗಾನಪ್ರಿಯಾಂ ಶ್ಯಾಮಲಾಂ

ಧ್ಯಾಯೇ ಚೇತಸಿ ಕಾಲಹಸ್ತಿನಿಲಯಾಂ ಜ್ಞಾನಪ್ರಸೂನಾಮ್ಬಿಕಾಮ್ || ೮ ||

ಕೌಮಾರೀಂ ನವಪಲ್ಲವಾಙ್ಘ್ರಿಯುಗಲಾಂ ಕರ್ಪೂರಭಾಸೋಜ್ಜ್ವಲಾಂ

ಗಂಗಾವರ್ತಸಮಾನನಾಭಿಕುಹರಾಂ ಗಾಂಗೇಯಭೂಷಾನ್ವಿತಾಮ್ |

ಚನ್ದ್ರಾರ್ಕಾನಲಕೋಟಿಕೋಟಿಸದೃಶಾಂ ಚನ್ದ್ರಾರ್ಕಬಿಮ್ಬಾನನಾಂ

ಧ್ಯಾಯೇ ಚೇತಸಿ ಕಾಲಹಸ್ತಿನಿಲಯಾಂ ಜ್ಞಾನಪ್ರಸೂನಾಮ್ಬಿಕಾಮ್ || ೯ ||

ಬಾಲಾದಿತ್ಯನಿಭಾನನಾಂ ತ್ರಿನಯನಾಂ ಬಾಲೇನ್ದುನಾ ಭೂಷಿತಾಂ

ನೀಲಾಕಾರಸುಕೇಶಿನೀಂ ವಿಲಸಿತಾಂ ನಿತ್ಯಾನ್ನದಾನಪ್ರದಾಮ್ |

ಶಙ್ಖಂ ಚಕ್ರವರಾಭಯಂ ಚ ದಧತೀಂ ಸಾರಸ್ವತಾರ್ಥಪ್ರದಾಂ

ಧ್ಯಾಯೇ ಚೇತಸಿ ಕಾಲಹಸ್ತಿನಿಲಯಾಂ ಜ್ಞಾನಪ್ರಸೂನಾಮ್ಬಿಕಾಮ್ || ೧೦ ||