Tuesday, February 26, 2013

ಶ್ರೀಮೀನಾಕ್ಷೀಮಣಿಮಾಲಾಷ್ಟಕಮ್


ಶ್ರೀಮೀನಾಕ್ಷೀಮಣಿಮಾಲಾಷ್ಟಕಮ್

ಮಧುರಾಪುರಿ ನಾಯಿಕೇ ನಮಸ್ತೇ ಮಧುರಾಲಾಪಿಶುಕಾಭಿರಾಮಹಸ್ತೇ |
ಮಲಯಧ್ವಜಪಾಣ್ಡ್ಯರಾಜಕನ್ಯೇ ಮಯಿ ಮೀನಾಕ್ಷಿ ಕೃಪಾಂ ವಿಧೇಹಿ ಧನ್ಯೇ || ||

ಕಚನಿರ್ಜಿತಕಾಲಮೇಘಕಾನ್ತೇ ಕಮಲಾಸೇವಿತಪಾದಪಙ್ಕಜಾನ್ತೇ |
ಮಧುರಾಪುರವಲ್ಲಭೇಷ್ಟಕಾನ್ತೇ ಮಯಿ ಮೀನಾಕ್ಷಿ ದಯಾಂ ವಿಧೇಹಿ ಶಾನ್ತೇ || ||

ಕುಚಯುಗ್ಮವಿಧೂತಚಕ್ರವಾಕೇ ಕೃಪಯಾಪಾಲಿತಸರ್ವಜೀವಲೋಕೇ |
ಮಲಯಧ್ವಜಸನ್ತತೇಃ ಪತಾಕೇ ಮಯಿ ಮೀನಾಕ್ಷಿ ಕೃಪಾಂ ನಿಧೇಹಿ ಪಾಕೇ || ||

ವಿಧಿವಾಹನಜೇತೃಕೇಲಿಯಾನೇ ವಿಮತಾಮೋಟನಪೂಜಿತಾಪದಾನೇ |
ಮಧುರೇಕ್ಷಣಭಾವಭೂತಮೀನೇ ಮಯಿ ಮೀನಾಕ್ಷಿ ಕೃಪಾಂ ವಿಧೇಹಿ ದೀನೇ || ||

ತಪನೀಯಪಯೋಜಿನೀತಟಸ್ಥೇ ತುಹಿನಪ್ರಾಯಮಹೀಧರೋದರಸ್ಥೇ |
ಮದನಾರಿಪರಿಗ್ರಹೇ ಕೃತಾರ್ಥೇ ಮಯಿ ಮೀನಾಕ್ಷಿ ಕೃಪಾಂ ನಿಧೇಹಿ ಸಾರ್ಥೇ || ||

ಕಲಕೀರಕಲೋಕ್ತಿನಾದದಕ್ಷೇ  ಕಲಿತಾನೇಕಜಗನ್ನಿವಾಸಿರಕ್ಷೇ |
ಮದನಾಶುಗಹಲ್ಲಕಾನ್ತಪಾಣೇ ಮಯಿ ಮೀನಾಕ್ಷಿ ಕೃಪಾಂ ಕುರು ಪ್ರವೀಣೇ || ||

ಮಧುವೈರಿವಿರಿಞ್ಚಿಮುಖ್ಯಸೇವ್ಯೇ ಮನಸಾ ಭಾವಿತಚನ್ದ್ರಮೌಲಿಸವ್ಯೇ |
ತರಸಾ ಪರಿಪೂರಿತಯಜ್ಞಹವ್ಯೇ ಮಯಿ ಮೀನಾಕ್ಷಿ ಕೃಪಾಂ ವಿಧೇಹಿ ಭವ್ಯೇ|| ||

ಜಗದಮ್ಬ ಕದಮ್ಬಮೂಲವಾಸೇ ಕಮಲಾಮೋದಮುಖೇನ್ದುಮನ್ದಹಾಸೇ |
ಮದಮನ್ದಿರಹಾರಿದೃಗ್ವಿಲಾಸೇ ಮಯಿ ಮೀನಾಕ್ಷಿ ಕೃಪಾಂ ವಿಧೇಹಿ ದಾಸೇ || ||

ಪಠತಾಮನಿಶಂ ಪ್ರಭಾತಕಾಲೇ ಮಣಿಮಾಲಾಷ್ಟಕಮಷ್ಟಭೂತಿದಾಯೀ |
ಘಟಿಕಾಶತಚಾತುರೀಂ ಪ್ರದದ್ಯಾತ್ ಕರುಣಾಪೂರ್ಣಕಟಾಕ್ಷಸನ್ನಿವೇಶಾತ್ || ||
  

No comments:

Post a Comment