ಆನನ್ದಲಹರೀ

                ಆನನ್ದಲಹರೀ

    (ಶ್ರೀ ಶಂಕರಾಚಾರ್ಯಕೃತಂ)

ಭವಾನಿ ಸ್ತೋತುಂ ತ್ವಾಂ ಪ್ರಭವತಿ ಚತುರ್ಭಿರ್ನವದನೈಃ

ಪ್ರಜಾನಾಮೀಶಾನಃ ತ್ರಿಪುರಮಥನಃ ಪಞ್ಚಭಿರಪಿ |

ನ ಷಡ್ಭಿಃ ಸೇನಾನೀಃ ದಶಶತಮುಖೈರಪ್ಯಹಿಪತಿಃ  

ತದಾನ್ಯೇಷಾಂ ಕೇಷಾಂ ಕಥಯ ಕಥಮಸ್ಮಿನ್ನವಸರಃ || ೧ ||

ಘೃತಕ್ಷೀರದ್ರಾಕ್ಷಾಮಧುಮಧುರಿಮಾ ಕೈರಪಿಪದೈಃ

ವಿಶಿಷ್ಯಾನಾಖ್ಯೇಯೋ ಭವತಿ ರಸನಾಮಾತ್ರವಿಷಯಃ |

ತಥಾ ತೇ ಸೌನ್ದರ್ಯಂ ಪರಮಶಿವದೃಙ್ಮಾತ್ರವಿಷಯಃ

ಕಥಙ್ಕಾರಂ ಬ್ರೂಮಃ ಸಕಲನಿಗಮಾಗೋಚರಗುಣೇ || ೨ ||

 

ಮುಖೇ ತೇ ತಾಮ್ಬೂಲಂ ನಯನಯುಗಲೇ ಕಜ್ಜಲಕಲಾ

ಲಲಾಟೇ ಕಾಶ್ಮೀರಂ ವಿಲಸತಿ ಗಲೇ ಮೌಕ್ತಿಕಲತಾ |

ಸ್ಫುರತ್ ಕಾಞ್ಚೀ ಶಾಟೀ ಪೃಥುಕಟಿತಟೇ ಹಾಟಕಮಯೀ

ಭಜಾಮಿ ತ್ವಾಂ ಗೌರೀಂ ನಗಪತಿಕಿಶೋರೀಮವಿರತಂ || ೩ ||

ವಿರಾಜನ್ಮನ್ದಾರದ್ರುಮಕುಸುಮಹಾರಸ್ತನತಟೀ

ನದದ್ವೀಣಾನಾದಶ್ರವಣವಿಲಸತ್ಕುಣ್ಡಲಗುಣಾ |

ನತಾಙ್ಗೀ ಮಾತನ್ಙ್ಗೀ ರುಚಿರಗತಿಭಙ್ಗೀ ಭಗವತೀ

ಸತೀ ಶಂಭೋರಂಭೋರುಹಚಟುಲಚಕ್ಷುರ್ವಿಜಯತೇ || ೪ ||

ನವೀನಾರ್ಕಭ್ರಾಜನ್ಮಣಿಕನಕಭೂಷಾಪರಿಕರೈಃ

ವೃತಾಙ್ಗೀ ಸಾರಙ್ಗೀ ರುಚಿರನಯನಾಙ್ಗೀಕೃತಶಿವಾ |

ತಡಿತ್ಪೀತಾ ಪೀತಾಮ್ಬರಲಲಿತಮಞ್ಜೀರಸುಭಗಾ

ಮಮಾಪರ್ಣಾ ಪೂರ್ಣಾ ನಿರವಧಿಸುಖೈರಸ್ತು ಸುಮುಖೀ || ೫ ||

ಹಿಮಾದ್ರೇ ಸಂಭೂತಾ ಸುಲಲಿತಕರೈಃ ಪಲ್ಲವಯುತಾ

ಸುಪುಷ್ಪಾ ಮುಕ್ತಾಭಿರ್ಭ್ರಮರಕಲಿತಾಚಾಲಕಭರೈಃ |

ಕೃತಸ್ಥಾಣುಸ್ಥಾನಾ ಕುಚಫಲನತಾ ಸೂಕ್ತಿಸರಸಾ

ರುಜಾಂ ಹನ್ತ್ರೀ ಗನ್ತ್ರೀ ವಿಲಸತಿ ಚಿದಾನನ್ದಲತಿಕಾ || ೬ ||

ಸಪರ್ಣಾಮಾಕೀರ್ಣಾಂ ಕತಿಪಯಗುಣೈಃ ಸಾದರಮಿಹ

ಶ್ರಯನ್ತ್ಯನ್ಯೇ ವಲ್ಲೀಂ ಮಮ ತು ಮತಿರೇವಂ ವಿಲಸತಿ |

ಅಪರ್ಣೈಕಾ ಸೇವ್ಯಾ ಜಗತಿ ಸಕಲೈರ್ಯತ್ಪರಿವೃತಃ

ಪುರಾಣೋಽಪಿ ಸ್ಥಾಣುಃ ಫಲತಿ ಕಿಲ ಕೈವಲ್ಯಪದವೀಮ್ || ೭ ||

ವಿಧಾತ್ರೀ ಧರ್ಮಾಣಾಂ ತ್ವಮಸಿ ಸಕಲಾಮ್ನಾಯಜನನೀ

ತ್ವಮರ್ಥಾನಾಂ ಮೂಲಂ ಧನದನಮನೀಯಾಙ್ಘ್ರಿಕಮಲೇ |

ತ್ವಮಾದಿಃ ಕಾಮಾನಾಂ ಜನನಿ ಕೃತಕನ್ದರ್ಪವಿಜಯೇ

ಸತಾಂ ಮುಕ್ತೇರ್ಬೀಜಂ ತ್ವಮಸಿ ಪರಬ್ರಹ್ಮಮಹಿಷೀ || ೮ ||

ಪ್ರಭೂತಾ ಭಕ್ತಿಸ್ತೇ ಯದಪಿ ನ ಮಮಾಲೋಲಮನಸಃ

ತ್ವಯಾತು ಶ್ರೀಮತ್ಯಾ ಸದಯಮವಲೋಕ್ಯೋಽಹಮಧುನಾ |

ಪಯೋದಃ ಪಾನೀಯಂ ದಿಶತಿ ಮಧುರಂ ಚಾತಕಮುಖೇ

ಭೃಶಂ ಶಙ್ಕೇ ಕೈರ್ವಾ ವಿಧಿಭಿರನುನೀತಾ ಮಮ ಮತಿಃ || ೯ ||

ಕೃಪಾಪಾಙ್ಗಾಲೋಕಂ ವಿತರ ತರಸಾ ಸಾಧುಚರಿತೇ

ನ ತೇ ಯುಕ್ತೋಪೇಕ್ಷಾ ಮಯಿ ಶರಣದೀಕ್ಷಾಮುಪಗತೇ |

ನ ಚೇದಿಷ್ಟಂ ದದ್ಯಾದನುಪದಮಹೋ ಕಲ್ಪಲತಿಕಾ

ವಿಶೇಷಃ ಸಾಮಾನ್ಯೈಃ ಕಥಮಿತರವಲ್ಲೀಪರಿಕರೈಃ || ೧೦ ||

ಮಹಾನ್ತಂ ವಿಶ್ವಾಸಂ ತವಚರಣಪಙ್ಕೇರುಹಯುಗೇ

ನಿಧಾಯನ್ಯನ್ನೈವಾಶ್ರಿತಮಿಹ ಮಯಾ ದೈವತಮುಮೇ |

ತಥಾಪಿ ತ್ವಚ್ಚೇತೋ ಯದಿ ಮಯಿ ನ ಜಾಯೇತ ಸದಯಂ

ನಿರಾಲಮ್ಬೋ ಲಮ್ಬೋದರಜನನಿ ಕಂ ಯಾಮಿ ಶರಣಮ್ || ೧೧ ||

ಅಯಃ ಸ್ಪರ್ಶೇ ಲಗ್ನಂ ಸಪದಿ ಲಭತೇ ಹೇಮಪದವೀಂ

ಯಥಾ ರಥ್ಯಾಪಾಥಃ ಶುಚಿ ಭವತಿ ಗಙ್ಗೌಘಮಿಲಿತಂ |

ತಥಾ ತತ್ತತ್ಪಾಪೈರತಿಮಲಿನಮನ್ತರ್ಮಮ ಯದಿ

ತ್ವಯಿ ಪ್ರೇಮ್ಣಾಸಕ್ತಂ ಕಥಮಿವ ನ ಜಾಯೇತ ವಿಮಲಮ್ || ೧೨ ||

ತ್ವದನ್ಯಸ್ಮಾದಿಚ್ಛಾವಿಷಯಫಲಲಾಭೇ ನ ನಿಯಮಃ

ತ್ವಮರ್ಥಾನಾಮಿಚ್ಛಾಧಿಕಮಪಿ ಸಮರ್ಥಾ ವಿತರಣೇ |

ಇತಿ ಪ್ರಾಹುಃ ಪ್ರಾಞ್ಚಃ ಕಮಲಭವನಾದ್ಯಾಸ್ತ್ವಯಿ ಮನಃ

ತ್ವದಾಸಕ್ತಂ ನಕ್ತಂದಿವಮುಚಿತಮೀಶಾನಿ ಕುರು ತತ್ || ೧೩ ||

ಸ್ಫುರನ್ನಾನಾರತ್ನ ಸ್ಫಟಿಕಮಯಭಿತ್ತಿಪ್ರತಿಫಲ-

ತ್ತ್ವದಾಕಾರಂ ಚಞ್ಚಚ್ಛಶಧರಕಲಾಸೌಧಶಿಖರಮ್ |

ಮುಕುನ್ದಬ್ರಹ್ಮೇನ್ದ್ರಪ್ರಭೃತಿಪರಿವಾರಂ ವಿಜಯತೇ

ತವಾಗಾರಂ ರಮ್ಯಂ ತ್ರಿಭುವನ ಮಹಾರಾಜಗೃಹಿಣಿ || ೧೪ ||

ನಿವಾಸಃ ಕೈಲಾಸೇ ವಿಧಿಶತಮಖಾದ್ಯಾಃ ಸ್ತುತಿಕರಾಃ

ಕುಟುಂಬಂ ತ್ರೈಲೋಕ್ಯಂ ಕೃತಕರಪುಟಃ ಸಿದ್ಧಿನಿಕರಃ | 

ಮಹೇಶಃ ಪ್ರಾಣೇಶಸ್ತದವನಿಧರಾಧೀಶತನಯೇ

ನ ತೇ ಸೌಭಾಗ್ಯಸ್ಯ ಕ್ವಚಿದಪಿ ಮನಾಗಸ್ತಿ ತುಲನಾ || ೧೫ ||

ವೃಷೋ ವೃದ್ಧೋ ಯಾನಂ ವಿಷಮಶನಮಾಶಾನಿವಸನಂ

ಶ್ಮಶಾನಂ ಕ್ರೀಡಾಭೂರ್ಭುಜಗನಿವಹೋ ಭೂಷಣವಿಧಿಃ |

ಸಮಗ್ರಾ ಸಾಮಗ್ರೀ ಜಗತಿ ವಿದಿತೈವಂ ಸ್ಮರರಿಪೋಃ

ಯದೇತಸ್ಯೈಶ್ವರ್ಯಂ ತವ ಜನನಿ ಸೌಭಾಗ್ಯಮಹಿಮಾ || ೧೬ ||

ಅಶೇಷಬ್ರಹ್ಮಾಣ್ಡಪ್ರಲಯವಿಧಿನೈಸರ್ಗಿಕಮತಿಃ

ಶ್ಮಶಾನೇಷ್ವಾಸೀನಃ ಕೃತಭಸಿತಲೇಪಃ ಪಶುಪತಿಃ |

ದಧೌ ಕಣ್ಠೇ ಹಾಲಾಹಲಮಖಿಲಭೂಗೋಲಕೃಪಯಾ

ಭವತ್ಯಾಃ ಸಂಗತ್ಯಾಃ ಫಲಮಿತಿ ಚ ಕಲ್ಯಾಣಿ ಕಲಯೇ || ೧೭ ||

ತ್ವದೀಯಂ ಸೌಂದರ್ಯಂ ನಿರತಿಶಯಮಾಲೋಕ್ಯ ಪರಯಾ

ಭಿಯೈವಾಸೀದ್ಗಙ್ಗಾ ಜಲಮಯತನುಃ ಶೈಲತನಯೇ |

ತದೇತಸ್ಯಾಸ್ತಸ್ಮಾದ್ವದನಕಮಲಂ ವೀಕ್ಷ್ಯ ಕೃಪಯಾ

ಪ್ರತಿಷ್ಠಾಮಾತನ್ವನ್ನಿಜಶಿರಸಿ ವಾಸೇನ ಗಿರಿಶಃ || ೧೮ ||

ವಿಶಾಲಶ್ರೀಖಣ್ಡದ್ರವಮೃಗಮದಾಕೀರ್ನಘುಸೃಣ-

ಪ್ರಸೂನವ್ಯಾಮಿಶ್ರಂ ಭಗವತಿ ತವಾಭ್ಯಙ್ಗಸಲಿಲಮ್ |

ಸಮಾದಾಯ ಸ್ರಷ್ಟಾ ಚಲಿತಪದಪಾಂಸೂನ್ನಿಜಕರೈಃ

ಸಮಾಧತ್ತೇ ಸೃಷ್ಟಿಂ ವಿಬುಧಪುರಪಙ್ಕೇರುಹದೃಶಾಮ್ || ೧೯ ||

ವಸನ್ತೇ ಸಾನನ್ದೇ ಕುಸುಮಿತಲತಾಭಿಃ ಪರಿವೃತೇ

ಸ್ಫುರನ್ನಾನಾಪದ್ಮೇ ಸರಸಿ ಕಲಹಂಸಾಲಿಸುಭಗೇ |

ಸಖೀಭಿಃ ಖೇಲನ್ತೀಂ ಮಲಯಪವನಾನ್ದೋಲಿತಜಲೇ

ಸ್ಮರೇದ್ಯಸ್ತ್ವಾಂ ತಸ್ಯ ಜ್ವರಜನಿತಪೀಡಾಪಸರತಿ || ೨೦ ||