ಆಪದುನ್ಮೂಲನದುರ್ಗಾಸ್ತೋತ್ರಮ್

ಆಪದುನ್ಮೂಲನದುರ್ಗಾಸ್ತೋತ್ರಮ್

 

ಲಕ್ಷ್ಮೀಶೇ ಯೋಗನಿದ್ರಾಂ ಪ್ರಭಜತಿ ಭುಜಗಾಧೀಶತಲ್ಪೇ ಸದರ್ಪಾ-

ವುತ್ಪನ್ನೌ ದಾನವೌ ತಚ್ಛ್ರವಣಮಲಮಯಾಙ್ಗೌ ಮಧುಂ ಕೈಟಭಂ ಚ |

ದೃಷ್ಟ್ವಾ ಭೀತಸ್ಯ ಧಾತುಃ ಸ್ತುತಿಭಿರಭಿನುತಾಂ ಆಶು ತೌ ನಾಶಯನ್ತೀಂ

ದುರ್ಗಾಂ ದೇವೀಂ ಪ್ರಪದ್ಯೇ ಶರಣಮಹಮಶೇಷಾಪದುನ್ಮೂಲನಾಯ || ೧ ||

ಯುದ್ಧೇ ನಿರ್ಜಿತ್ಯ ದೈತ್ಯಸ್ತ್ರಿಭುವನಮಖಿಲಂ ಯಸ್ತದೀಯ ಧಿಷ್ಣ್ಯೇ-

ಷ್ವಾಸ್ಥಾಪ್ಯ ಸ್ವಾನ್ ವಿಧೇಯಾನ್ ಸ್ವಯಮಗಮದಸೌ ಶಕ್ರತಾಂ ವಿಕ್ರಮೇಣ |

ತಂ ಸಾಮಾತ್ಯಾಪ್ತಮಿತ್ರಂ ಮಹಿಷಮಭಿನಿಹತ್ಯಾಸ್ಯಮೂರ್ಧಾಧಿರೂಢಾಂ

ದುರ್ಗಾಂ ದೇವೀಂ ಪ್ರಪದ್ಯೇ ಶರಣಮಹಮಶೇಷಾಪದುನ್ಮೂಲನಾಯ || ೨ ||

ವಿಶ್ವೋತ್ಪತ್ತಿಪ್ರಣಾಶಸ್ಥಿತಿವಿಹೃತಿಪರೇ ದೇವಿ ಘೋರಾಮರಾರಿ-

ತ್ರಾಸಾತ್ ತ್ರಾತುಂ ಕುಲಂ ನಃ ಪುನರಪಿ ಚ ಮಹಾಸಙ್ಕಟೇಷ್ವೀದೃಶೇಷು |

ಆವಿರ್ಭೂಯಾಃ ಪುರಸ್ತಾದಿತಿ ಚರಣನಮತ್ ಸರ್ವಗೀರ್ವಾಣ ವರ್ಗಾಂ

ದುರ್ಗಾಂ ದೇವೀಂ ಪ್ರಪದ್ಯೇ ಶರಣಮಹಮಶೇಷಾಪದುನ್ಮೂಲನಾಯ || ೩ ||

ಹನ್ತುಂ ಶುಂಭಂ ನಿಶುಂಭಂ ವಿಬುಧಗಣನುತಾಂ ಹೇಮಡೋಲಾಂ ಹಿಮಾದ್ರಾ-

ವಾರೂಢಾಂ ವ್ಯೂಢದರ್ಪಾನ್ ಯುಧಿ ನಿಹತವತೀಂ ಧೂಮ್ರದೃಕ್ ಚಣ್ಡಮುಣ್ಡಾನ್ |

ಚಾಮುಣ್ಡಾಖ್ಯಾಂ ದಧಾನಾಂ ಉಪಶಮಿತಮಹಾರಕ್ತಬೀಜೋಪಸರ್ಗಾಂ

ದುರ್ಗಾಂ ದೇವೀಂ ಪ್ರಪದ್ಯೇ ಶರಣಮಹಮಶೇಷಾಪದುನ್ಮೂಲನಾಯ || ೪ ||

ಬ್ರಹ್ಮೇಶಸ್ಕನ್ದನಾರಾಯಣಕಿಟಿನರಸಿಂಹೇನ್ದ್ರಶಕ್ತೀಃ ಸ್ವಭೃತ್ಯಾಃ

ಕೃತ್ವಾ ಹತ್ವಾ ನಿಶುಂಭಂ ಜಿತವಿಬುಧಗಣಂ ತ್ರಾಸಿತಾಶೇಷಲೋಕಮ್ |

ಏಕೀಭೂಯಾಥ ಶುಂಭಂ ರಣಶಿರಸಿ ನಿಹತ್ಯಾಸ್ಥಿತಾಂ ಆತ್ತಖಡ್ಗಾಂ

ದುರ್ಗಾಂ ದೇವೀಂ ಪ್ರಪದ್ಯೇ ಶರಣಮಹಮಶೇಷಾಪದುನ್ಮೂಲನಾಯ || ೫ ||

ಉತ್ಪನ್ನಾ ನನ್ದಜೇತಿ ಸ್ವಯಮವನಿತಲೇ ಶುಂಭಮನ್ಯಂ ನಿಶುಂಭಮ್

ಭ್ರಾಮರ್ಯಾಖ್ಯಾಽರುಣಾಖ್ಯಾ ಪುನರಪಿ ಜನನೀ ದುರ್ಗಮಾಖ್ಯಂ ನಿಹನ್ತುಮ್ |

ಭೀಮಾ ಶಾಕಂಭರೀತಿ ತ್ರುಟಿತರಿಪುಭಟಾಂ ರಕ್ತದನ್ತೇತಿ ಜಾತಾಂ

ದುರ್ಗಾಂ ದೇವೀಂ ಪ್ರಪದ್ಯೇ ಶರಣಮಹಮಶೇಷಾಪದುನ್ಮೂಲನಾಯ || ೬ ||

ತ್ರೈಗುಣ್ಯಾನಾಂ ಗುಣಾನಾಂ ಅನುಸರಣಕಲಾಕೇಲಿ ನಾನಾವತಾರೈಃ

ತ್ರೈಲೋಕ್ಯತ್ರಾಣಶೀಲಾಂ ದನುಜಕುಲವನೀ ವಹ್ನಿಲೀಲಾಂ ಸಲೀಲಾಮ್ |

ದೇವೀಂ ಸಚ್ಚಿನ್ಮಯೀಂ ತಾಂ ವಿತರಿತವಿನಮತ್ಸತ್ರಿವರ್ಗಾಪವರ್ಗಾಂ

ದುರ್ಗಾಂ ದೇವೀಂ ಪ್ರಪದ್ಯೇ ಶರಣಮಹಮಶೇಷಾಪದುನ್ಮೂಲನಾಯ || ೭ ||

ಸಿಂಹಾರೂಢಾಂ ತ್ರಿನೇತ್ರಾಂ ಕರತಲವಿಲಸತ್ ಶಂಖಚಕ್ರಾಸಿರಮ್ಯಾಂ

ಭಕ್ತಾಭೀಷ್ಟಪ್ರದಾತ್ರೀಂ ರಿಪುಮಥನಕರೀಂ ಸರ್ವಲೋಕೈಕವನ್ದ್ಯಾಮ್ |

ಸರ್ವಾಲಙ್ಕಾರಯುಕ್ತಾಂ ಶಶಿಯುತಮಕುಟಾಂ ಶ್ಯಾಮಲಾಙ್ಗೀಂ ಕೃಶಾಙ್ಗೀಂ

ದುರ್ಗಾಂ ದೇವೀಂ ಪ್ರಪದ್ಯೇ ಶರಣಮಹಮಶೇಷಾಪದುನ್ಮೂಲನಾಯ || ೮ ||

ತ್ರಾಯಸ್ವಸ್ವಾಮಿನೀತಿ ತ್ರಿಭುವನಜನನಿ ಪ್ರಾರ್ಥನಾ ತ್ವಯ್ಯಪಾರ್ಥಾ

ಪಾಲ್ಯನ್ತೇಽಭ್ಯರ್ಥನಾಯಾಂ ಭಗವತಿ ಶಿಶವಃ ಕಿನ್ನ್ವನನ್ಯಾಃ ಜನನ್ಯಾ |

ತತ್ತುಭ್ಯಂ ಸ್ಯಾನ್ನಮಸ್ಯೇತ್ಯವನತವಿಬುಧಾಹ್ಲಾದಿವೀಕ್ಷಾವಿಸರ್ಗಾಂ

ದುರ್ಗಾಂ ದೇವೀಂ ಪ್ರಪದ್ಯೇ ಶರಣಮಹಮಶೇಷಾಪದುನ್ಮೂಲನಾಯ || ೯ ||

ಏತಂ ಸನ್ತಃ ಪಠನ್ತು ಸ್ತವಮಖಿಲವಿಪಜ್ಜಾಲತೂಲಾನಲಾಭಂ

ಹೃನ್ಮೋಹಧ್ವಾನ್ತಭಾನುಪ್ರತಿಮಮಖಿಲಸಙ್ಕಲ್ಪಕಲ್ಪದ್ರುಕಲ್ಪಮ್ |

ದೌರ್ಗಂ ದೌರ್ಗತ್ಯಘೋರಾತಪತುಹಿನಕರಪ್ರಖ್ಯಮಂಹೋಗಜೇನ್ದ್ರ-

ಶ್ರೇಣೀಪಞ್ಚಾಸ್ಯದೇಶ್ಯಂ ವಿಪುಲಭಯದಕಾಲಾಹಿತಾರ್ಕ್ಷ್ಯಪ್ರಭಾವಮ್  || ೧೦ ||