ನವರತ್ನಮಾಲಿಕಾ

ನವರತ್ನಮಾಲಿಕಾ

    (ಶ್ರೀಶಂಕರಾಚಾರ್ಯಕೃತಮ್)

ಹಾರನೂಪರಕಿರೀಟಕುಣ್ಡಲವಿಭೂಷಿತಾವಯವಶೋಭಿನೀಂ

ಕಾರಣೇಶವರಮೌಲಿಕೋಟಿಪರಿಕಲ್ಪ್ಯಮಾನಪದಪೀಠಿಕಾಮ್ |

ಕಾಲಕಾಲಫಣಿಪಾಶಬಾಣಧನುರಙ್ಕುಶಾಮರುಣಮೇಖಲಾಂ

ಫಾಲಭೂತಿಲಕಲೋಚನಾಂ ಮನಸಿ ಭಾವಯಾಮಿ ಪರದೇವತಾಮ್ || ೧ ||

ಗನ್ಧಸಾರಘನಸಾರಚಾರುನವನಾಗವಲ್ಲಿರಸವಾಸಿನೀಂ

ಸಾನ್ಧ್ಯರಾಗಮಧುರಾಧರಾಭರಣಸುನ್ದರಾನನಶುಚಿಸ್ಮಿತಾಮ್ |

ಮನ್ಥರಾಯತವಿಲೋಚನಾಮಮಲಬಾಲಚನ್ದ್ರಕೃತಶೇಖರೀಂ

ಇನ್ದಿರಾರಮಣಸೋದರೀಂ ಮನಸಿ ಭಾವಯಾಮಿ ಪರದೇವತಾಮ್ || ೨ ||

ಸ್ಮೇರಚಾರುಮುಖಮಣ್ಡಲಾಂ ವಿಮಲಗಣ್ಡಲಮ್ಬಿಮಣಿಮಣ್ಡಲಾಂ

ಹಾರದಾಮಪರಿಶೋಭಮಾನಕುಚಭಾರಭೀರುತನುಮಧ್ಯಮಾಮ್ |

ವೀರಗರ್ವಹರನೂಪುರಾಂ ವಿವಿಧಕಾರಣೇಶವರಪೀಠಿಕಾಂ

ಮಾರವೈರಿಸಹಚಾರಿಣೀಂ ಮನಸಿ ಭಾವಯಾಮಿ ಪರದೇವತಾಮ್ || ೩ ||

ಭೂರಿಭಾರಧರಕುಣ್ಡಲೀನ್ದ್ರಮಣಿಬದ್ಧಭೂವಲಯಪೀಠಿಕಾಂ

ವಾರಿರಾಶಿಮಣಿಮೇಖಲಾವಲಯವಹ್ನಿಮಣ್ಡಲಶರೀರಿಣೀಮ್ |

ವಾರಿಸಾರವಹಕುಣ್ಡಲಾಂ ಗಗನಶೇಖರೀಂ ಚ ಪರಾತ್ಮಿಕಾಂ

ಚಾರುಚನ್ದ್ರವಿಲೋಚನಾಂ ಮನಸಿ ಭಾವಯಾಮಿ ಪರದೇವತಾಮ್ || ೪ ||

ಕುಣ್ಡಲತ್ರಿವಿಧಕೋಣಮಣ್ಡಲವಿಹಾರಷಡ್ದಲಸಮುಲ್ಲಸತ್-

ಪುಣ್ಡರೀಕಮುಖಭೇದಿನೀಂ ತರುಣಚಣ್ಡಭಾನುತಡಿದುಜ್ಜ್ವಲಾಮ್ |

ಮಣ್ಡಲೇನ್ದುಪರಿವಾಹಿತಾಮೃತತರಙ್ಗಿಣೀಮರುಣರೂಪಿಣೀಂ

ಮಣ್ಡಲಾನ್ತಮಣಿದೀಪಿಕಾಂ ಮನಸಿ ಭಾವಯಾಮಿ ಪರದೇವತಾಮ್ || ೫ ||

 

ವಾರಣಾನನಮಯೂರವಾಹಮುಖದಾಹವಾರಣಪಯೋಧರಾಂ

ಚಾರಣಾದಿಸುರಸುನ್ದರೀಚಿಕುರಶೇಖರೀಕೃತಪದಾಂಬುಜಾಮ್ |

ಕಾರಣಾಧಿಪತಿಪಞ್ಚಕಪ್ರಕೃತಿಕಾರಣಪ್ರಥಮಮಾತೃಕಾಂ

ವಾರಣಾನ್ತಮುಖಪಾರಣಾಂ ಮನಸಿ ಭಾವಯಾಮಿ ಪರದೇವತಾಮ್ || ೬ ||

ಪದ್ಮಕಾನ್ತಿಪದಪಾಣಿಪಲ್ಲವಪಯೋಧರಾನನಸರೋರುಹಾಂ

ಪದ್ಮರಾಗಮಣಿಮೇಖಲಾವಲಯನೀವಿಶೋಭಿತನಿತಮ್ಬಿನೀಮ್ |

ಪದ್ಮಸಮ್ಭವಸದಾಶಿವಾನ್ತಮಯಪಞ್ಚರತ್ನಪದಪೀಠಿಕಾಂ

ಪದ್ಮಿನೀಂ ಪ್ರಣವರೂಪಿಣೀಂ ಮನಸಿ ಭಾವಯಾಮಿ ಪರದೇವತಾಮ್ || ೭ ||

ಆಗಮಪ್ರಣವಪೀಠಿಕಾಮಮಲವರ್ಣಮಂಗಲಶರೀರಿಣೀಂ

ಆಗಮಾವಯವಶೋಭಿನೀಮಖಿಲವೇದಸಾರಕೃತಶೇಖರೀಮ್ |

ಮೂಲಮನ್ತ್ರಮುಖಮಣ್ಡಲಾಂ ಮುದಿತನಾದಬಿನ್ದುನವಯೌವನಾಂ

ಮಾತೃಕಾಂ ತ್ರಿಪುರಸುನ್ದರೀಂ ಮನಸಿ ಭಾವಯಾಮಿ ಪರದೇವತಾಮ್ || ೮ ||

ಕಾಲಿಕಾತಿಮಿರಕುನ್ತಲಾನ್ತಘನಭೃಙ್ಗಮಙ್ಗಲವಿರಾಜಿನೀಂ

ಚೂಲಿಕಾಶಿಖರಮಾಲಿಕಾವಲಯಮಲ್ಲಿಕಾಸುರಭಿಸೌರಭಾಮ್ |

ವಾಲಿಕಾಮಧುರಗಣ್ಡಮಣ್ಡಲಮನೋಹರಾನನಸರೋರುಹಾಮ್

ಕಾಲಿಕಾಮಖಿಲನಾಯಿಕಾಂ ಮನಸಿ ಭಾವಯಾಮಿ ಪರದೇವತಾಮ್ || ೯ ||

ನಿತ್ಯಮೇವ ನಿಯಮೇನ ಜಪತಾಂ

ಭುಕ್ತಿಮುಕ್ತಿಫಲದಾಮಭೀಷ್ಟದಾಮ್ |

ಶಂಕರೇಣ ರಚಿತಾಂ ಸದಾ ಜಪೇ-

ನ್ನಾಮರತ್ನನವರತ್ನಮಾಲಿಕಾಮ್ || ೧೦ ||