ಭವಾನೀಭುಜಙ್ಗಮ್

. ಭವಾನೀಭುಜಙ್ಗಮ್

 

ಷಡಾಧಾರಪಙ್ಕೇರುಹಾನ್ತರ್ವಿರಾಜತ್

ಸುಷುಮ್ನಾನ್ತರಾಲೇಽತಿತೇಜೋಲ್ಲಸನ್ತೀಮ್ |

ಸುಧಾಮಣ್ಡಲಂ ದ್ರಾವಯನ್ತೀಂ ಪಿಬನ್ತೀಂ

ಸುಧಾಮೂರ್ತಿಮೀಡೇ ಚಿದಾನನ್ದರೂಪಾಮ್ || ೧ ||

ಜ್ವಲತ್ಕೋಟಿಬಾಲಾರ್ಕಭಾಸಾರುಣಾಂಗೀಂ

ಸಲಾವಣ್ಯಶೃಂಗಾರಶೋಭಾಭಿರಾಮಾಮ್ |

ಮಹಾಪದ್ಮಕಿಞ್ಜಲ್ಕಮಧ್ಯೇವಿರಾಜತ್

ತ್ರಿಕೋಣೇ ನಿಷಣ್ಣಾಂ ಭಜೇ ಶ್ರೀ ಭವಾನೀಮ್ || ೨ ||

ಕ್ವಣತ್ಕಿಙ್ಕಿಣೀನೂಪುರೋದ್ಭಾಸಿರತ್ನ-

ಪ್ರಭಾಲೀಢಲಾಕ್ಷಾರ್ದ್ರಪಾದಾಬ್ಜಯುಗ್ಮಮ್ |

ಅಜೇಶಾಚ್ಯುತಾದ್ಯೈಃ ಸುರೈಃ ಸೇವ್ಯಮಾನಂ

ಮಹಾದೇವಿ ಮನ್ಮೂರ್ಧ್ನಿ ತೇ ಭಾವಯಾಮಿ || ೩ ||

ಸುಶೋಣಾಮ್ಬರಾಬದ್ಧನೀವೀವಿರಾಜ-

ನ್ಮಹಾರತ್ನಕಾಞ್ಚೀಕಲಾಪಂ ನಿತಮ್ಬಮ್ |

ಸ್ಫುರದ್ದಕ್ಷಿಣಾವರ್ತನಾಭಿಂ ಚ ತಿಸ್ರೋ

ವಲೀರಮ್ಬ ತೇ ರೋಮರಾಜೀಂ ಭಜೇಽಹಮ್ || ೪ ||

ಲಸದ್ವೃತ್ತಮುತ್ತುಙ್ಗಮಾಣಿಕ್ಯಕುಂಭೋ-

ಪಮಶ್ರೀ ಸ್ತನದ್ವನ್ದ್ವಮಮ್ಬಾಮ್ಬುಜಾಕ್ಷಿ |

ಭಜೇ ದುಗ್ಧಪೂರ್ಣಾಭಿರಾಮಂ ತವೇದಂ

ಮಹಾಹಾರದೀಪ್ತಂ ಸದಾ ಪ್ರಸ್ನುತಾಸ್ಯಮ್ || ೫ ||

ಶಿರೀಷಪ್ರಸೂನೋಲ್ಲಸದ್ಬಾಹುದಣ್ಡೈ-

ರ್ಜ್ವಲದ್ಬಾಣಕೋದಣ್ಡಪಾಶಾಙ್ಕುಶೈಶ್ಚ |

ಚಲತ್ಕಙ್ಕಣೋದಾರಕೇಯೂರಭೂಷೋ-

ಜ್ಜ್ವಲದ್ಭಿರ್ಲಸನ್ತೀಂ ಭಜೇ ಶ್ರೀ ಭವಾನೀಮ್ || ೬ ||

ಶರತ್ಪೂರ್ಣಚನ್ದ್ರಪ್ರಭಾಪೂರ್ಣಬಿಮ್ಬಾ-

ಧರಸ್ಮೇರವಕ್ತ್ರಾರವಿನ್ದಾಂ ಸುಶಾನ್ತಾಮ್ |

ಸುರತ್ನಾವಲೀಹಾರತಾಟಙ್ಕಶೋಭಾಂ

ಮಹಾಸುಪ್ರಸನ್ನಾಂ ಭಜೇ ಶ್ರೀ ಭವಾನೀಮ್ || ೭ ||

ಸುನಾಸಾಪುಟಂ ಸುನ್ದರಭ್ರೂಲಲಾಟಂ

ತವೌಷ್ಠಶ್ರಿಯಂ ದಾನದಕ್ಷಂ ಕಟಾಕ್ಷಮ್ |

ಲಲಾಟೇ ಲಸದ್ಗನ್ಧಕಸ್ತೂರಿಭೂಷಂ

ಸ್ಫುರಚ್ಛ್ರೀಮುಖಾಮ್ಭೋಜಮೀಡ್ಯೇಽಹಮಮ್ಬ || ೮ ||

ಚಲತ್ಕುನ್ತಲಾನ್ತರ್ಭ್ರಮತ್ಭೃಙ್ಗಬೃನ್ದಂ

ಘನಸ್ನಿಗ್ದ್ಧಧಮ್ಮಿಲ್ಲಭೂಷೋಜ್ಜ್ವಲಂ ತೇ |

ಸ್ಫುರನ್ಮೌಲಿಮಾಣಿಕ್ಯಬದ್ಧೇನ್ದುರೇಖಾ-

ವಿಲಾಸೋಲ್ಲಸದ್ದಿವ್ಯಮೂರ್ಧಾನಮೀಡೇ || ೯ ||

ಇತಿ ಶ್ರೀಭವಾನೀ ಸ್ವರೂಪಂ ತವೇದಂ

ಪ್ರಪಞ್ಚಾತ್ಪರಂ ಚಾತಿಸೂಕ್ಷ್ಮಂ ಪ್ರಸನ್ನಮ್ |

ಸ್ಫುರತ್ವಮ್ಬ ಡಿಂಭಸ್ಯ ಮೇ ಹೃತ್ಸರೋಜೇ

ಸದಾ ವಾಙ್ಮಯಂ ಸರ್ವತೇಜೋಮಯಂ ಚ || ೧೦ ||

ಗಣೇಶಾಭಿಮುಖ್ಯಾಖಿಲೈಃ ಶಕ್ತಿಬೃನ್ದೈರ್-

ವೃತಾಂ ವೈ ಸ್ಫುರಚ್ಚಕ್ರರಾಜೋಲ್ಲಸನ್ತೀಮ್ |

ಪರಾಂ ರಾಜರಾಜೇಶ್ವರಿ ತ್ರೈಪುರಿ ತ್ವಾಂ

ಶಿವಾಙ್ಕೋಪರಿಸ್ಥಾಂ ಶಿವಾಂ ಭಾವಯಾಮಿ || ೧೧ ||

ತ್ವಮರ್ಕಸ್ತ್ವಮಿನ್ದುಸ್ತ್ವಮಗ್ನಿಸ್ತ್ವಮಾಪ-

ಸ್ತ್ವಮಾಕಾಶಭೂವಾಯವಸ್ತ್ವಂ ಮಹತ್ತ್ವಮ್ |

ತ್ವದನ್ಯೋ ನ ಕಶ್ಚಿತ್ಪ್ರಪಞ್ಚೋಽಸ್ತಿ ಸರ್ವಂ

ತ್ವಾಮಾನನ್ದಸಂವಿತ್ಸ್ವರೂಪಾಂ ಭಜೇಽಹಮ್ || ೧೨ ||

ಶ್ರುತೀನಾಮಗಮ್ಯೇ ಸುವೇದಾಗಮಜ್ಞಾ

ಮಹಿಮ್ನೋ ನ ಜಾನನ್ತಿ ಪಾರಂ ತವಾಮ್ಬ |

ಸ್ತುತಿಂ ಕರ್ತುಮಿಚ್ಛಾಮಿ ತೇ ತ್ವಂ ಭವಾನಿ

ಕ್ಷಮಸ್ವೇದಮತ್ರ ಪ್ರಮುಗ್ದ್ಧಃ ಕಿಲಾಹಮ್ || ೧೩ ||

ಗುರುಸ್ತ್ವಂ ಶಿವಸ್ತ್ವಂ ಚ ಶಕ್ತಿಸ್ತ್ವಮೇವ

ತ್ವಮೇವಾಸಿಮಾತಾ ಪಿತಾ ಚ ತ್ವಮೇವ |

ತ್ವಮೇವಾಸಿ ವಿದ್ಯಾ ತ್ವಮೇವಾಸಿ ಬನ್ಧುರ್-

ಗತಿರ್ಮೇ ಮತಿರ್ದೇವಿ ಸರ್ವಂ ತ್ವಮೇವ || ೧೪ ||

ಇತೀಮಾಂ ಮಹಚ್ಛ್ರೀಭವಾನೀಭುಜಂಗಂ

ಸ್ತುತಿಂ ಯಃ ಪಠೇದ್ಭಕ್ತಿಯುಕ್ತಶ್ಚ ತಸ್ಮೈ |

ಸ್ವಕೀಯಂ ಪದಂ ಶಾಶ್ವತಂ ವೇದಸಾರಂ

ಶ್ರಿಯಂ ಚಾಷ್ಟಸಿದ್ಧಿಂ ಭವಾನೀ ದದಾತಿ || ೧೫ ||

ಭವಾನೀ ಭವಾನೀ ಭವಾನೀ ತ್ರಿವಾರ-

ಮುದಾರಂ ಮುದಾ ಸರ್ವದಾ ಯೇ ಜಪನ್ತಿ |

ನ ಶೋಕಂ ನ ಮೋಹಂ ನ ಪಾಪಂ ನ ಭೀತಿಃ

ಕದಾಚಿತ್ ಕಥಂಚಿತ್ ಕುತಶ್ಚಿಜ್ಜನಾನಾಮ್ || ೧೬ ||