ಶ್ರೀಮಂತ್ರಮಾತೃಕಾಪುಷ್ಪಮಾಲಾಸ್ತವಃ

ಶ್ರೀಮಂತ್ರಮಾತೃಕಾಪುಷ್ಪಮಾಲಾಸ್ತವಃ

           (ಶ್ರೀಶಂಕರಾಚಾರ್ಯಕೃತಂ)

 

ಕಲ್ಲೋಲೋಲ್ಲಸಿತಾಮೃತಾಬ್ಧಿಲಹರೀಮಧ್ಯೇವಿರಾಜನ್ಮಣಿ-

ದ್ವೀಪೇ ಕಲ್ಪಕವಾಟಿಕಾ ಪರಿವೃತೇ ಕಾದಮ್ಬವಾಟ್ಯುಜ್ಜ್ವಲೇ |

ರತ್ನಸ್ತಂಭಸಹಸ್ರನಿರ್ಮಿತಸಭಾಮಧ್ಯೇ ವಿಮಾನೋತ್ತಮೇ

ಚಿನ್ತಾರತ್ನ ವಿನಿರ್ಮಿತಂ ಜನನಿ ತೇ ಸಿಂಹಾಸನಂ ಭಾವಯೇ || ೧ ||

 ಏಣಾಙ್ಕಾನಲಭಾನುಮಣ್ಡಲಲಸತ್ ಶ್ರೀಚಕ್ರಮಧ್ಯೇಸ್ಥಿತಾಂ

ಬಾಲಾರ್ಕದ್ಯುತಿಭಾಸುರಾಂ ಕರತಲೈಃ ಪಾಶಾಙ್ಕುಶೌ ಬಿಭ್ರತೀಮ್ |

ಚಾಪಂ ಬಾಣಮಪಿ ಪ್ರಸನ್ನವದನಾಂ ಕೌಸುಮ್ಭವಸ್ತ್ರಾನ್ವಿತಾಂ

ತಾಂ ತ್ವಾಂ ಚನ್ದ್ರಕಲಾವತಂಸಮಕುಟಾಂ ಚಾರುಸ್ಮಿತಾಂ ಭಾವಯೇ || ೨ ||

ಈಶಾನಾದಿಪದಂ ಶಿವೈಕಫಲಕಂ ರತ್ನಾಸನಂ ತೇ ಶುಭಂ

ಪಾದ್ಯಂ ಕುಙ್ಕುಮಚನ್ದನಾದಿಭರಿತೈರರ್ಘ್ಯಂ ಸರತ್ನಾಕ್ಷತೈಃ |

ಶುದ್ಧೈರಾಚಮನೀಯಕಂ ತವ ಜಲೈರ್ಭಕ್ತ್ಯಾ ಮಯಾ ಕಲ್ಪಿತಂ

ಕಾರುಣ್ಯಾಮೃತವಾರಿಧೇ ತದಖಿಲಂ ಸನ್ತುಷ್ಟಯೇ ಕಲ್ಪತಾಮ್ || ೩ ||

ಲಕ್ಷ್ಯೇ ಯೋಗಿಜನಸ್ಯ ರಕ್ಷಿತಜಗಜ್ಜಾಲೇ ವಿಶಾಲೇಕ್ಷಣೇ

ಪ್ರಾಲೇಯಾಂಬು ಪಟೀರಕುಙ್ಕುಮಲಸತ್ ಕರ್ಪೂರಮಿಶ್ರೋದಕೈಃ |

ಗೋಕ್ಷೀರೈರಪಿ ನಾರಿಕೇಲಸಲಿಲೈಃ ಶುದ್ಧೋದಕೈರ್ಮನ್ತ್ರಿತೈಃ

ಸ್ನಾನಂ ದೇವಿ ಧಿಯಾ ಮಯೈತದಖಿಲಂ ಸನ್ತುಷ್ಟಯೇ ಕಲ್ಪತಾಮ್ || ೪ ||

ಹ್ರೀಙ್ಕಾರಾಙ್ಕಿತಮನ್ತ್ರಲಕ್ಷಿತತನೋ ಹೇಮಾಚಲಾತ್ಸಂಚಿತೈಃ

ರತ್ನೈರುಜ್ಜ್ವಲಮುತ್ತರೀಯಸಹಿತಂ ಕೌಸುಂಭವರ್ಣಾಂಶುಕಮ್ |

ಮುಕ್ತಾಸನ್ತತಿ ಯಜ್ಞಸೂತ್ರಮಮಲಂ ಸೌವರ್ಣತನ್ತೂದ್ಭವಂ

ದತ್ತಂ ದೇವಿ ಧಿಯಾ ಮಯೈತದಖಿಲಂ ಸನ್ತುಷ್ಟಯೇ ಕಲ್ಪತಾಮ್ || ೬ ||

ಹಂಸೈರಪ್ಯತಿಲೋಭನೀಯಗಮನೇ ಹಾರಾವಲೀಮುಜ್ಜ್ವಲಾಂ

ಹಿನ್ದೋಲದ್ಯುತಿಹೀರಪೂರಿತತರೇ ಹೇಮಾಙ್ಗದೇ ಕಙ್ಕಣೇ |

ಮಂಜೀರೌ ಮಣಿಕುಣ್ಡಲೇ ಮಕುಟಮಪ್ಯರ್ಧೇನ್ದುಚೂಡಾಮಣಿಂ

ನಾಸಾಮೌಕ್ತಿಕಮಙ್ಗುಲೀಯಕಟಕೌ ಕಞ್ಚೀಮಪಿ ಸ್ವೀಕುರು || ೭ ||

ಸರ್ವಾಙ್ಗೇ ಘನಸಾರಕುಙ್ಕುಮಲಸತ್ ಶ್ರೀಗನ್ಧಪಙ್ಕಾಙ್ಕಿತಂ

ಕಸ್ತೂರೀತಿಲಕಂ ಚ ಫಾಲಫಲಕೇ ಗೋರೋಚನಾಪತ್ರಕಮ್ |

ಗಣ್ಡಾದರ್ಶನಮಣ್ಡಲೇ ನಯನಯೋರ್ದಿವ್ಯಾಞ್ಜನಂ ತೇಽಞ್ಚಿತಂ

ಕಣ್ಠಾಬ್ಜೇ ಮೃಗನಾಭಿಪಙ್ಕಮಮಲಂ ತ್ವತ್ಪ್ರೀತಯೇ ಕಲ್ಪತಾಮ್ || ೮ ||

ಕಲ್ಹಾರೋತ್ಪಲಮಲ್ಲಿಕಾಮರುವಕೈಃ ಸೌವರ್ಣಪಙ್ಕೇರುಹೈಃ

ಜಾತೀಚಂಪಕಮಾಲತೀವಕುಲಕೈಃ ಮನ್ದಾರಕುನ್ದಾದಿಭಿಃ |

ಕೇತಕ್ಯಾ ಕರವೀರಕೈರ್ಬಹುವಿಧೈಃ ಕ್~ಳುಪ್ತಾಃ ಸ್ರಜೋಮಾಲಿಕಾಃ

ಸಙ್ಕಲ್ಪೇನ ಸಮರ್ಪಯಾಮಿ ವರದೇ ಸಂತುಷ್ಟಯೇ ಗೃಹ್ಯತಾಮ್ || ೯ ||

ಹನ್ತಾರಂ ಮದನಸ್ಯ ನನ್ದಯಸಿಯೈರಙ್ಗೈರನಂಗೋಜ್ಜ್ವಲೈಃ

ಯೈರ್ಭೃಙ್ಗಾವಲಿನೀಲಕುನ್ತಲಭರೈಃ ಬಧ್ನಾಸಿ ತಸ್ಯಾಶಯಮ್ |

ತಾನೀಮಾನಿ ತವಾಮ್ಬ ಕೋಮಲತರಾಣ್ಯಾಮೋದಲೀಲಾಗೃಹಾ-

ಣ್ಯಾಮೋದಾಯ ದಶಾಙ್ಗಗುಗ್ಗುಲುಕೃತೈಃ ಧೂಪೈರಹಂ ಧೂಪಯೇ || ೧೦ ||

 

ಲಕ್ಷೀಮುಜ್ಜ್ವಲಯಾಮಿ ರತ್ನನಿವಹೋದ್ಭಾಸ್ವತ್ತರೇ ಮನ್ದಿರೇ

ಮಾಲಾರೂಪವಿಲಮ್ಬಿತೈರ್ಮಣಿಮಯಸ್ತಮ್ಭೇಷು ಸಮ್ಭಾವಿತೈಃ |

ಚಿತ್ರೈರ್ಹಾಟಕಪುತ್ರಿಕಾಕರಧೃತೈಃ ಗವ್ಯೈರ್ಘೃತೈವರ್ಧಿತೈಃ

ದಿವ್ಯೈರ್ದೀಪಗಣೈರ್ಧಿಯಾ ಗಿರಿಸುತೇ ಸಂತುಷ್ಟಯೇ ಕಲ್ಪತಾಮ್ || ೧೧ ||

ಹ್ರೀಙ್ಕಾರೇಶ್ವರಿ ತಪ್ತಹಾಟಕಕೃತೈಃ ಸ್ಥಾಲೀಸಹಸ್ರೈರ್ಭೃತಂ

ದಿವ್ಯಾನ್ನಂ ಘೃತಸೂಪಶಾಕಭರಿತಂ ಚಿತ್ರಾನ್ನಭೇದಂ ತಥಾ |

ಶಾಲ್ಯನ್ನಂ ಮಧುಶರ್ಕರಾದಧಿಯುತಂ ಮಾಣಿಕ್ಯಪಾತ್ರೇಸ್ಥಿತಮ್

ಮಾಷಾಪೂಪಸಹಸ್ರಮಮ್ಬಸಫಲಂ ನೈವೇದ್ಯಮಾವೇದಯೇ || ೧೨ ||

ಸಚ್ಛಾಯೈರ್ವರಕೇತಕೀದಲರುಚಾ ತಾಮ್ಬೂಲವಲ್ಲೀದಲೈಃ

ಪೂಗೈರ್ಭೂರಿಗುಣೈರ್ಸುಗನ್ಧಿಮಧುರೈಃ ಕರ್ಪೂರಖಣ್ಡೋಜ್ಜ್ವಲೈಃ |

ಮುಕ್ತಾಚೂರ್ಣವಿರಾಜಿತೈರ್ಬಹುವಿಧೈಃ ವಕ್ತ್ರಾಮ್ಬುಜಾಮೋದನೈಃ

ಪೂರ್ಣಾ ರತ್ನಕಲಾಚಿಕಾ ತವ ಮುದೇ ನ್ಯಸ್ತಾ ಪುರಸ್ತಾದುಮೇ || ೧೩ ||

ಕನ್ಯಾಭಿಃ ಕಮನೀಯಕಾನ್ತಿಭಿರಲಙ್ಕಾರಾಮಲಾರಾರ್ತಿಕಾ

ಪಾತ್ರೇ ಮೌಕ್ತಿಕಚಿತ್ರಪಂಕ್ತಿವಿಲಸತ್ ಕರ್ಪೂರದೀಪಾಲಿಭಿಃ |

ತತ್ತತ್ತಾಲಮೃದಙ್ಗಗೀತಸಹಿತಂ ನೃತ್ಯತ್ಪದಾಮ್ಭೋರುಹಂ

ಮನ್ತ್ರಾರಾಧನಪೂರ್ವಕಂ ಸುವಿಹಿತಂ ನೀರಾಜನಂ ಗೃಹ್ಯತಾಮ್ || ೧೪ ||

ಲಕ್ಷ್ಮೀರ್ಮೌಕ್ತಿಕಲಕ್ಷಕಲ್ಪಿತಸಿತಚ್ಛತ್ರಂ ತು ಧತ್ತೇ ರಸಾತ್

ಇನ್ದ್ರಾಣೀ ಚ ರತಿಶ್ಚ ಚಾಮರವರೇ ಧತ್ತೇ ಸ್ವಯಂ ಭಾರತೀ |

ವೀಣಾಮೇಣವಿಲೋಚನಾಃ ಸುಮನಸಾಂ ನೃತ್ಯನ್ತಿ ತದ್ರಾಗವದ್

ಭಾವೈರಾಙ್ಗಿಕಸಾತ್ವಿಕೈಃ ಸ್ಫುಟರಸಂ ಮಾತಸ್ತದಾಕರ್ಣ್ಯತಾಮ್ || ೧೫ ||

ಹ್ರೀಙ್ಕಾರತ್ರಯಸಂಪುಟೇನ ಮನುನೋಪಾಸ್ಯೇ ತ್ರಯೀಮೌಲಿಭಿರ್-

ವಾಕ್ಯೈರ್ಲಕ್ಷ್ಯತನೋ ತವಸ್ತುತಿವಿಧೌ ಕೋ ವಾ ಕ್ಷಮೇತಾಮ್ಬಿಕೇ |

ಸಲ್ಲಾಪಾಃ ಸ್ತುತಯಃ ಪ್ರದಕ್ಷಿಣಶತಂ ಸಞ್ಚಾರ ಏವಾಸ್ತುತೇ

ಸಂವೇಶೋ ನಮನಃ ಸಹಸ್ರಮಖಿಲಂ ತ್ವತ್ಪ್ರೀತಯೇ ಕಲ್ಪತಾಮ್ || ೧೬ ||

ಶ್ರೀಮನ್ತ್ರಾಕ್ಷರಮಾಲಯಾ ಗಿರಿಸುತಾಂ ಯಃ ಪೂಜಯೇಚ್ಚೇತಸಾ

ಸನ್ಧ್ಯಾಸು ಪ್ರತಿವಾಸರಂ ಸುನಿಯತಸ್ತಸ್ಯಾಮಲಂ ಸ್ಯಾನ್ಮನಃ |

ಚಿತ್ತಾಂಭೋರುಹಮಣ್ಡಪೇ ಗಿರಿಸುತಾ ನೃತ್ತಂ ವಿಧತ್ತೇ ರಸಾತ್

ವಾಣೀ ವಕ್ತ್ರ ಸರೋರುಹೇ ಜಲಧಿಜಾ ಗೇಹೇ ಜಗನ್ಮಙ್ಗಲಾ || ೧೭ ||

ಇತಿ ಗಿರಿವರಪುತ್ರೀ ಪಾದರಜೀವಭೂಷಾ

ಭುವನಮಮಲಯನ್ತೀ ಸೂಕ್ತಿಸೌರಭ್ಯಸಾರೈಃ |

ಶಿವಪದಮಕರನ್ದಸ್ಯನ್ದಿನೀಯಂ ನಿಬದ್ಧಾ

ಮದಯತು ಕವಿಭೃಙ್ಗಾನ್ ಮಾತೃಕಾಪುಷ್ಪಮಾಲಾ || ೧೮ ||