ಶ್ರೀಲಲಿತಾಪಞ್ಚರತ್ನಮ್

      ಶ್ರೀಲಲಿತಾಪಞ್ಚರತ್ನಮ್

  ( ಶ್ರೀ ಶಂಕರಾಚಾರ್ಯಕೃತಮ್)

ಪ್ರಾತಃ ಸ್ಮರಾಮಿ ಲಲಿತಾವದನಾರವಿನ್ದಂ

ಬಿಮ್ಬಾಧರಂ ಪೃಥುಲಮೌಕ್ತಿಕಶೋಭಿನಾಸಮ್ |

ಆಕರ್ಣದೀರ್ಘನಯನಂ ಮಣಿಕುಣ್ಡಲಾಢ್ಯಂ

ಮನ್ದಸ್ಮಿತಂ ಮೃಗಮದೋಜ್ಜ್ವಲಫಾಲದೇಶಮ್ || ೧ ||

ಪ್ರಾತರ್ಭಜಾಮಿ ಲಲಿತಾಭುಜಕಲ್ಪವಲ್ಲೀಂ

ರತ್ನಾಙ್ಗುಲೀಯಲಸದಙ್ಗುಳಿಪಲ್ಲವಾಢ್ಯಾಮ್ |

ಮಾಣಿಕ್ಯಹೇಮವಲಯಾಙ್ಗದಶೋಭಮಾನಾಂ

ಪುಣ್ಡ್ರೇಕ್ಷುಚಾಪಕುಸುಮೇಷುಸೃಣೀದಧಾನಾಮ್ || ೨ ||

ಪ್ರಾತರ್ನಮಾಮಿ ಲಲಿತಾಚರಣಾರವಿನ್ದಂ

ಭಕ್ತೇಷ್ಟದಾನನಿರತಂ ಭವಸಿನ್ಧುಪೋತಮ್ |

ಪದ್ಮಾಸನಾದಿ ಸುರನಾಯಕಪೂಜನೀಯಂ

ಪದ್ಮಾಙ್ಕುಶಧ್ವಜಸುದರ್ಶನಲಾಞ್ಛನಾಢ್ಯಮ್ || ೩ ||

ಪ್ರಾತಸ್ತುವೇ ಪರಶಿವಾಂ ಲಲಿತಾಂ ಭವಾನೀಂ

ತ್ರಯ್ಯನ್ತವೇದ್ಯವಿಭವಾಂ ಕರುಣಾನವದ್ಯಾಮ್ |

ವಿಶ್ವಸ್ಯ ಸೃಷ್ಟಿವಿಲಯಸ್ಥಿತಿಹೇತುಭೂತಾಂ

ವಿಶ್ವೇಶ್ವರೀಂ ನಿಗಮವಾಙ್ಮನಸಾತಿದೂರಾಮ್ || ೪ ||

ಪ್ರಾತರ್ವದಾಮಿ ಲಲಿತೇ ತವ ಪುಣ್ಯನಾಮ

ಕಾಮೇಶ್ವರೀತಿ ಕಮಲೇತಿ ಮಹೇಶ್ವರೀತಿ |

ಶ್ರೀ ಶಾಂಭವೀತಿ ಜಗತಾಂ ಜನನೀ ಪರೇತಿ

ವಾಗ್ದೇವತೇತಿ ವಚಸಾ ತ್ರಿಪುರೇಶ್ವರೀತಿ || ೫ ||

ಯಃ ಶ್ಲೋಕಪಞ್ಚಕಮಿದಂ ಲಲಿತಾಮ್ಬಿಕಾಯಾಃ

ಸೌಭಾಗ್ಯದಂ ಸುಲಲಿತಂ ಪಠತಿ ಪ್ರಭಾತೇ |

ತಸ್ಮೈ ದದಾತಿ ಲಲಿತಾ ಝಟಿತಿ ಪ್ರಸನ್ನಾ

ವಿದ್ಯಾಂ ಶ್ರಿಯಂ ವಿಮಲಸೌಖ್ಯಮನನ್ತಕೀರ್ತಿಮ್ || ೬ ||