ಕಾಮಾಕ್ಷ್ಯಷ್ಟಕಮ್

ಕಾಮಾಕ್ಷ್ಯಷ್ಟಕಮ್

ಶ್ರೀಕಾಞ್ಚೀಪುರವಾಸಿನೀಂ ಭಗವತೀಂ ಶ್ರೀಚಕ್ರಮಧ್ಯೇ ಸ್ಥಿತಾಂ

ಕಲ್ಯಾಣೀಂ ಕಮನೀಯ ಚಾರು ಮಕುಟಾಂ ಕೌಸುಮ್ಭವಸ್ತ್ರಾನ್ವಿತಾಮ್ |

ಶ್ರೀ ವಾಣೀಶಚಿಪೂಜಿತಾಙ್ಘ್ರಿಯುಗಲಾಂ ಚಾರುಸ್ಮಿತಾಂ ಸುಪ್ರಭಾಂ

ಕಾಮಾಕ್ಷೀಂ ಕರುಣಾಮಯೀಂ ಭಗವತೀಂ ವನ್ದೇ ಪರಾಂ ದೇವತಾಮ್ || ೧ ||

ಮಾಲಾಮೌಕ್ತಿಕಕನ್ಧರಾಂ ಶಶಿಮುಖೀಂ ಶಮ್ಭುಪ್ರಿಯಾಂ ಸುನ್ದರೀಂ

ಶರ್ವಾಣೀಂ ಶರಚಾಪಮಣ್ಡಿತಕರಾಂ ಶೀತಾಂಶುಬಿಮ್ಬಾನನಾಮ್ |

ವೀಣಾಗಾನವಿನೋದಕೇಲಿರಸಿಕಾಂ ವಿದ್ಯುತ್ಪ್ರಭಾಭಾಸುರಾಂ

ಕಾಮಾಕ್ಷೀಂ ಕರುಣಾಮಯೀಂ ಭಗವತೀಂ ವನ್ದೇ ಪರಾಂ ದೇವತಾಮ್ || ೨ ||

ಶ್ಯಾಮಾಂ ಚಾರುನಿತಮ್ಬಿನೀಂ ಗುರುಭುಜಾಂ ಚನ್ದ್ರಾವತಂಸಾಂ ಶಿವಾಂ

ಶರ್ವಾಲಿನ್ಙ್ಗಿತ ನೀಲಚಾರುವಪುಷೀಂ ಶಾನ್ತಾಂ ಪ್ರವಾಲಾಧರಾಮ್ |

ಬಾಲಾಂ ಬಾಲತಮಾಲಕಾನ್ತಿರುಚಿರಾಂ ಬಾಲಾರ್ಕಬಿಮ್ಬೋಜ್ಜ್ವಲಾಮ್

ಕಾಮಾಕ್ಷೀಂ ಕರುಣಾಮಯೀಂ ಭಗವತೀಂ ವನ್ದೇ ಪರಾಂ ದೇವತಾಮ್ || ೩ ||

ಲೀಲಾಕಲ್ಪಿತಜೀವಕೋಟಿನಿವಹಾಂ ಚಿದ್ರೂಪಿಣೀಂ ಶಂಕರೀಂ

ಬ್ರಹ್ಮಾಣೀಂ ಭವರೋಗತಾಪಶಮನೀಂ ಭವ್ಯಾತ್ಮಿಕಾಂ ಶಾಶ್ವತೀಮ್ |

ದೇವೀಂ ಮಾಧವಸೋದರೀಂ ಶುಭಕರೀಂ ಪಞ್ಚಾಕ್ಷರೀಂ ಪಾವನೀಂ

ಕಾಮಾಕ್ಷೀಂ ಕರುಣಾಮಯೀಂ ಭಗವತೀಂ ವನ್ದೇ ಪರಾಂ ದೇವತಾಮ್ || ೪ ||

ವಾಮಾಂ ವಾರಿಜಲೋಚನಾಂ ಹರಿಹರಬ್ರಹ್ಮೇನ್ದ್ರಸಂಪೂಜಿತಾಂ

ಕಾರುಣ್ಯಾಮೃತವರ್ಷಿಣೀಂ ಗುಣಮಯೀಂ ಕಾತ್ಯಾಯನೀಂ ಚಿನ್ಮಯೀಮ್ |

ದೇವೀಂ ಶುಮ್ಭನಿಷೂದಿನೀಂ ಭಗವತೀಂ ಕಾಮೇಶ್ವರೀಂ ದೇವತಾಂ

ಕಾಮಾಕ್ಷೀಂ ಕರುಣಾಮಯೀಂ ಭಗವತೀಂ ವನ್ದೇ ಪರಾಂ ದೇವತಾಮ್ || ೫ ||

ಕಾನ್ತಾಂ ಕಾಞ್ಚನರತ್ನಭೂಷಿತಗಲಾಂ ಸೌಭಾಗ್ಯಮುಕ್ತಿಪ್ರದಾಂ

ಕೌಮಾರೀಂ ತ್ರಿಪುರಾನ್ತಕಪ್ರಣಯಿನೀಂ ಕಾದಮ್ಬಿನೀಂ ಚಣ್ಡಿಕಾಮ್ |

ದೇವೀಂ ಶಂಕರಹೃತ್ಸರೋಜನಿಲಯಾಂ ಸರ್ವಾಘಹನ್ತ್ರೀಂ ಶುಭಾಂ

ಕಾಮಾಕ್ಷೀಂ ಕರುಣಾಮಯೀಂ ಭಗವತೀಂ ವನ್ದೇ ಪರಾಂ ದೇವತಾಮ್ || ೬ ||

ಶಾನ್ತಾಂ ಚನ್ಞ್ಚಲಚಾರುನೇತ್ರಯುಗಲಾಂ ಶೈಲೇನ್ದ್ರಕನ್ಯಾಂ ಶಿವಾಂ

ವಾರಾಹೀಂ ದನುಜಾನ್ತಕೀಂ ತ್ರಿನಯನೀಂ ಸರ್ವಾತ್ಮಿಕಾಂ ಮಾಧವೀಮ್ |

ಸೌಮ್ಯಾಂ ಸಿನ್ಧುಸುತಾಂ ಸರೋಜವದನಾಂ ವಾಗ್ದೇವತಾಮಮ್ಬಿಕಾಂ

ಕಾಮಾಕ್ಷೀಂ ಕರುಣಾಮಯೀಂ ಭಗವತೀಂ ವನ್ದೇ ಪರಾಂ ದೇವತಾಮ್ || ೭ ||

ಚನ್ದ್ರಾರ್ಕಾನಲಲೋಚನಾಂ ಗುರುಕುಚಾಂ ಸೌನ್ದರ್ಯಚನ್ದ್ರೋದಯಾಂ

ವಿದ್ಯಾಂ ವಿನ್ಧ್ಯನಿವಾಸಿನೀಂ ಪುರಹರಪ್ರಾಣಪ್ರಿಯಾಂ ಸುನ್ದರೀಮ್ |

ಮುಗ್ದ್ಧಸ್ಮೇರಸಮೀಕ್ಷಣೇನ ಸತತಂ ಸಮ್ಮೋಹಯನ್ತೀಂ ಶಿವಾಮ್

ಕಾಮಾಕ್ಷೀಂ ಕರುಣಾಮಯೀಂ ಭಗವತೀಂ ವನ್ದೇ ಪರಾಂ ದೇವತಾಮ್ || ೮ |