ಗೌರೀದಶಕಮ್

ಗೌರೀದಶಕಮ್

    (ಶ್ರೀ ಶಙ್ಕರಾಚಾರ್ಯಕೃತಮ್)

 ಲೀಲಾಲಬ್ಧಸ್ಥಾಪಿತಲುಪ್ತಾಖಿಲಲೋಕಾಂ

 ಲೋಕಾತೀತೈರ್ಯೋಗಿಭಿರನ್ತಶ್ಚಿರಮೃಗ್ಯಾಮ್ |

 ಬಾಲಾದಿತ್ಯಶ್ರೇಣಿಸಮಾನದ್ಯುತಿಪುಞ್ಜಾಂ

 ಗೌರೀಮಮ್ಬಾಮಮ್ಬುರುಹಾಕ್ಷೀಮಹಮೀಡೇ || ೧ ||

ಅಶಾಪಾಶಕ್ಲೇಶವಿನಾಶಂ ವಿದಧಾನಾಂ

ಪಾದಾಂಭೋಜಧ್ಯಾನಪರಾಣಾಂ ಪುರುಷಾಣಾಮ್ |

ಈಶಾಮೀಶಾರ್ಧಾಙ್ಗಹರಾಂ ತಾಮಭಿರಾಮಾಂ

ಗೌರೀಮಮ್ಬಾಮಮ್ಬುರುಹಾಕ್ಷೀಮಹಮೀಡೇ || ೨ ||

ನಾನಾಕಾರೈಶ್ಶಕ್ತಿಕದಮ್ಬೈರ್ಭುವನಾನಿ

ವ್ಯಾಪ್ಯ ಸ್ವೈರಂ ಕ್ರೀಡತಿ ಯೇಯಂ ಸ್ವಯಮೇಕಾ |

ಕಲ್ಯಾಣೀಂ ತಾಂ ಕಲ್ಪಲತಾಮಾನತಿಭಾಜಾಂ

ಗೌರೀಮಮ್ಬಾಮಮ್ಬುರುಹಾಕ್ಷೀಮಹಮೀಡೇ || ೩ ||

ಮೂಲಾಧಾರಾದುತ್ಥಿತರೀತ್ಯಾ ವಿಧಿರನ್ಧ್ರಂ

ಸೌರಂ ಚಾನ್ದ್ರಂ ವ್ಯಾಪ್ಯ ವಿಹಾರಜ್ವಲಿತಾಂಗೀಮ್ |

ಯೇಯಂ ಸೂಕ್ಷ್ಮಾತ್ ಸೂಕ್ಷ್ಮತನುಸ್ತಾಂ ಸುಖರೂಪಾಂ

ಗೌರೀಮಮ್ಬಾಮಮ್ಬುರುಹಾಕ್ಷೀಮಹಮೀಡೇ || ೪ ||

ಯಸ್ಯಾಮೋತಂ ಪ್ರೋತಮಶೇಷಂ ಮಣಿಮಾಲಾ-

ಸೂತ್ರೇ ಯದ್ವತ್ ಕ್ವಾಪಿ ಚರಂ ಚಾಪ್ಯಚರಂ ಚ |

ತಾಮಧ್ಯಾತ್ಮಜ್ಞಾನಪದವ್ಯಾ ಗಮನೀಯಾಂ

ಗೌರೀಮಮ್ಬಾಮಮ್ಬುರುಹಾಕ್ಷೀಮಹಮೀಡೇ || ೫ ||

ಪ್ರತ್ಯಾಹಾರಧ್ಯಾನಸಮಾಧಿಸ್ಥಿತಿಭಾಜಾಂ

ನಿತ್ಯಂ ಚಿತ್ತೇ ನಿರ್ವೃತಿಕಾಷ್ಠಾಂ ಕಲಯನ್ತೀಮ್ |

ಸತ್ಯಜ್ಞಾನಾನನ್ದಮಯೀಂ ತಾಂ ತನುಮಧ್ಯಾಂ

ಗೌರೀಮಮ್ಬಾಮಮ್ಬುರುಹಾಕ್ಷೀಮಹಮೀಡೇ || ೬ ||

ಚನ್ದ್ರಾಪೀಡಾನನ್ದಿತಮನ್ದಸ್ಮಿತವಕ್ತ್ರಾಂ

ಚನ್ದ್ರಾಪೀಡಾಲಂಕೃತನೀಲಾಲಕಭಾರಾಮ್ |

ಇನ್ದ್ರೋಪೇನ್ದ್ರಾರ್ಚಿತಪಾದಾಂಬುಜಯುಗ್ಮಾಂ

ಗೌರೀಮಮ್ಬಾಮಮ್ಬುರುಹಾಕ್ಷೀಮಹಮೀಡೇ || ೭ ||

ಆದಿಕ್ಷಾನ್ತಾಮಕ್ಷರಮೂರ್ತ್ಯಾ ವಿಲಸನ್ತೀಂ

ಭೂತೇ ಭೂತೇ ಭೂತಕದಮ್ಬಪ್ರಸವಿತ್ರೀಮ್ |

ಶಬ್ದಬ್ರಹ್ಮಾನನ್ದಮಯೀಂ ತಾಂ ತಡಿದಾಭಾಂ

ಗೌರೀಮಮ್ಬಾಮಮ್ಬುರುಹಾಕ್ಷೀಮಹಮೀಡೇ || ೮ ||

ಯಸ್ಯಾಃ ಕುಕ್ಷೌ ಲೀನಮಖಣ್ಡಂ ಜಗದಣ್ಡಂ

ಭೂಯೋ ಭೂಯಃ ಪ್ರಾದುರಭೂದುತ್ಥಿತಮೇವ |

ಪತ್ಯಾ ಸಾರ್ಧಂ ರಾಜತಶೈಲೇ ವಿಹರನ್ತೀಂ

ಗೌರೀಮಮ್ಬಾಮಮ್ಬುರುಹಾಕ್ಷೀಮಹಮೀಡೇ || ೯ ||

ನಿತ್ಯಃ ಶುದ್ಧೋ ನಿಷ್ಕಲ ಏಕೋ ಜಗದೀಶಃ

ಸಾಕ್ಷೀ ಯಸ್ಯಾಃ ಸರ್ಗವಿಧೌ ಸಂಹರೇಣ ಚ |

ವಿಶ್ವತ್ರಾಣಕ್ರೀಡನಲೋಲಾಂ ಶಿವಪತ್ನೀಂ

ಗೌರೀಮಮ್ಬಾಮಮ್ಬುರುಹಾಕ್ಷೀಮಹಮೀಡೇ || ೧೦ ||

ಪ್ರಾತಃಕಾಲೇ ಭಾವವಿಶುದ್ಧಿಂ ವಿದಧಾನೋ

ಭಕ್ತ್ಯಾ ನಿತ್ಯಂ ಜಲ್ಪತಿ ಗೌರೀದಶಕಂ ಯಃ |

ವಾಚಾಂ ಸಿದ್ಧಿಂ ಸಂಪದಮುಚ್ಚೈಶ್ಶಿವಭಕ್ತಿಂ

ತಸ್ಯಾವಶ್ಯಂ ಪರ್ವತಪುತ್ರೀ ವಿದಧಾತಿ || ೧೧ ||