ಶ್ರೀ ಮೂಕಾಮ್ಬಿಕಾಸ್ತೋತ್ರಮ್

ಶ್ರೀ ಮೂಕಾಮ್ಬಿಕಾಸ್ತೋತ್ರಮ್

ಮೂಲಾಮ್ಭೋರುಹಮಧ್ಯಕೋಣವಿಲಸತ್ಬನ್ಧೂಕರಾಗೋಜ್ಜ್ವಲಾಂ

ಜ್ವಾಲಾಜಾಲಜಿತೇನ್ದುಕಾನ್ತಿಲಹರೀಮಾನನ್ದ ಸನ್ದಾಯಿನೀಮ್ |

ಹೇಲಾಲಾಲಿತ ನೀಲಕುನ್ತಲಧರಾಂ ನೀಲೋತ್ಪಲಾಭಾಂಶುಕಾಂ

ಕೋಲ್ಲೂರಾದ್ರಿನಿವಾಸಿನೀಂ ಭಗವತೀಂ ಧ್ಯಾಯಾಮಿ ಮೂಕಾಮ್ಬಿಕಾಮ್ || ೧ ||

ಬಾಲಾದಿತ್ಯನಿಭಾನನಾಂ ತ್ರಿನಯನಾಂ ಬಾಲೇನ್ದುನಾಭೂಷಿತಾಂ

ನೀಲಾಕಾರ ಸುಕೇಶಿನೀಂ ಸುಲಲಿತಾಂ ನಿತ್ಯಾನ್ನದಾನಪ್ರಿಯಾಮ್ |

ಶ್ಙ್ಖಂ ಚಕ್ರಗದಾಭಯಂ ಚ ದಧತೀಂ ಸಾರಸ್ವತಾರ್ಥಪ್ರದಾಂ

ತಾಂ ಬಾಲಾಂ ತ್ರಿಪುರೀಂ ಶಿವೇನಸಹಿತಾಂ ಧ್ಯಾಯಾಮಿ ಮೂಕಾಮ್ಬಿಕಾಮ್ || ೨ ||

ಮಧ್ಯಾಹ್ನಾರ್ಕಸಹಸ್ರಕೋಟಿಸದೃಶಾಂ ಮಾಯಾನ್ಧಕಾರಸ್ಥಿತಾಂ

ಮಧ್ಯನ್ತಾದಿಭಿರರ್ಚಿತಾಂ ಮದಕರೀಂ ಮಾರೇಣ ಸಂಸೇವಿತಾಮ್ |

ಶೂಲಂಪಾಶಕಪಾಲಪುಸ್ತಕಧರಾಂ ಶುದ್ಧಾರ್ಥವಿಜ್ಞಾನದಾಂ

ತಾಂ ಬಾಲಾಂ ತ್ರಿಪುರೀಂ ಶಿವೇನಸಹಿತಾಂ ಧ್ಯಾಯಾಮಿ ಮೂಕಾಮ್ಬಿಕಾಮ್ || ೩ ||

ಸನ್ಧ್ಯಾರಾಗಸಮಾನನಾಂ ತ್ರಿನಯನಾಂ ಸನ್ಮಾನಸೈಃ ಪೂಜಿತಾಂ

ಚಕ್ರಾಕ್ಷಾಭಯಕಂಬುಶೋಭಿತಕರಾಂ ಪ್ರಾಲಮ್ಬವೇಣೀಯುತಾಮ್ |

ಈಷತ್ಫುಲ್ಲಸುಕೇತಕೀವರದಲೈರಭ್ಯರ್ಚಿತಾಂ ತಾಂ ಶಿವಾಂ

ತಾಂ ಬಾಲಾಂ ತ್ರಿಪುರೀಂ ಶಿವೇನಸಹಿತಾಂ ಧ್ಯಾಯಾಮಿ ಮೂಕಾಮ್ಬಿಕಾಮ್ || ೪ ||

ಚನ್ದ್ರಾದಿತ್ಯಸಮಾನಕುಣ್ಡಲಧರಾಂ ಚನ್ದ್ರಾರ್ಕಕೋಟಿಪ್ರಭಾಂ

ಚನ್ದ್ರಾರ್ಕಾಗ್ನಿವಿಲೋಚನಾಂ ಶಶಿಮುಖೀಮಿನ್ದ್ರಾದಿಸಂಸೇವಿತಾಮ್ |

ಭಕ್ತಾಭೀಷ್ಟವರಪ್ರದಾಂ ತ್ರಿನಯನಾಂ ಚಿನ್ತಾಕುಲಧ್ವಂಸಿನೀಂ

ಮನ್ತ್ರಾರಾದಿ ವನೇ ಸ್ಥಿತಾಂ ಮಣಿಮಯೀಂ ಧ್ಯಾಯಾಮಿ ಮೂಕಾಮ್ಬಿಕಾಮ್ || ೫ ||

ಕಲ್ಯಾಣೀಂ ಕಮಲೇಕ್ಷಣಾಂ ನಿರವಧಿಂ ವನ್ದಾರುಚಿನ್ತಾಮಣಿಂ

ಕಲ್ಯಾಣಾಚಲಸಂಸ್ಥಿತಾಂ ಘನಕೃಪಾಂ ಮಾಯಾಂ ಮಹಾವೈಷ್ಣವೀಮ್ |

ಕಲ್ಯಾಂ ಕಂಬುಸುದರ್ಶನಾಭಯಕರಾಂ ಶಮ್ಭುಪ್ರಿಯಾಂ ಕಾಮದಾಂ

ಕಲ್ಯಾಣೀಂ ತ್ರಿಪುರೀಂ ಶಿವೇನಸಹಿತಾಂ ಧ್ಯಾಯಾಮಿ ಮೂಕಾಮ್ಬಿಕಾಮ್ || ೬ ||

ಕಾಲಾಮ್ಭೋಧರಕುಣ್ಡಲಾಞ್ಚಿತಮುಖಾಂ ಕರ್ಪೂರವೀಟೀಯುತಾಂ

ಕರ್ಣಾಲಮ್ಬಿತಹೇಮಕುಣ್ಡಲಧರಾಂ ಮಾಣಿಕ್ಯಕಾಞ್ಚೀಧರಾಮ್ |

ಕೈವಲ್ಯೈಕಪರಾಯಣಾಂ ಕಲಿಮಲಪ್ರಧ್ವಂಸಿನೀಂ ಕಾಮದಾಂ

ಕಲ್ಯಾಣೀಂ ತ್ರಿಪುರೀಂ ಶಿವೇನಸಹಿತಾಂ ಧ್ಯಾಯಾಮಿ ಮೂಕಾಮ್ಬಿಕಾಮ್ || ೭ ||

ನಾನಾಕಾಞ್ಚಿ ವಿಚಿತ್ರವಸ್ತ್ರಸಹಿತಾಂ ನಾನಾವಿಧೈರ್ಭೂಷಿತಾಂ

ನಾನಾಪುಷ್ಪಸುಗನ್ಧಮಾಲ್ಯಸಹಿತಾಂ ನಾನಾಜನಾಸೇವಿತಾಮ್ |

ನಾನಾರೂಪಧರಾಂ ಮಹೇಶಮಹಿಷೀಂ ಧ್ಯಾಯಾಮಿ ಮೂಕಾಮ್ಬಿಕಾಮ್  || ೮ ||

ರಾಕಾತಾರಕನಾಯಕೋಜ್ಜ್ವಲಮುಖೀಂ ಶ್ರೀಕಾಮಕಾಮ್ಯಪ್ರದಾಂ

ಶೋಕಾರಣ್ಯಧನಞ್ಜಯಪ್ರತಿನಿಭಾಂ  ಕೋಪಾಟವೀಚನ್ದ್ರಿಕಾಮ್ |

ಶ್ರೀಕಾನ್ತಾದಿ ಸುರಾರ್ಚಿತಾಂ ಸ್ತ್ರಿಯಮಿಮಾಂ ಲೋಕಾವಲೀನಾಶಿನೀಂ

ಲೋಕಾನನ್ದಕರೀಂ ನಮಾಮಿ ಶಿರಸಾ ಧ್ಯಾಯಾಮಿ ಮೂಕಾಮ್ಬಿಕಾಮ್ || ೯ ||

ಕಾಞ್ಚೀಕಿಙ್ಕಿಣಿಕಙ್ಕಣಾಞ್ಚಿತಕರಾಂ ಮಞ್ಜೀರಹಾರೋಜ್ಜ್ವಲಾಂ

ಚಞ್ಚತ್ಕಾಞ್ಚನಕಿರೀಟಕಟಿದಾಮಾಶ್ಲೇಷಭೂಷೋಜ್ಜ್ವಲಾಮ್ |

ಕಿಞ್ಚಿತ್ ಕಾಞ್ಚನ ಕಞ್ಚುಕೇ ಮಣಿಮಯೇ ಪದ್ಮಾಸನೇ ಸಂಸ್ಥಿತಾಂ

ಪಞ್ಚಾದ್ಯಞ್ಚಿತಸಞ್ಚರೀಂ ಭಗವತೀಂ ಧ್ಯಾಯಾಮಿ ಮೂಕಾಮ್ಬಿಕಾಮ್ || ೧೦ ||

ಸೌವರ್ಣಾಮ್ಬುಜಮಧ್ಯಕಾಞ್ಚಿನಯನಾಂ ಸೌದಾಮಿನೀಸನ್ನಿಭಾಂ

ಶಙ್ಖಂ ಚಕ್ರವರಾಭಯಾನಿದಧತೀಂ ಇನ್ದೋಃ ಕಲಾಂ ಬಿಭ್ರತೀಮ್ |

ಗ್ರೈವೇಯಾಸಕ್ತಹಾರಕುಣ್ಡಲಧರಾಂ ಆಖಣ್ಡಲಾದಿಸ್ತುತಾಂ

ಮಾಯಾಂ ವಿನ್ಧ್ಯನಿವಾಸಿನೀಂ ಭಗವತೀಂ ಧ್ಯಾಯಾಮಿ ಮೂಕಾಮ್ಬಿಕಾಮ್ || ೧೧ ||

ಶ್ರೀಮನ್ವಿಭವೇನ ಸುರೈರ್ಮುನಿಗಣೈರಪ್ಸರೋಪಾಸ್ಯ ಸೇವ್ಯಾಂ

ಮನ್ತ್ರಾರಾದಿಸಮಸ್ತದೇವವನಿತೈಃ ಸಂಶೋಭಮಾನಾಂ ಶಿವಾಂ |

ಸೌವರ್ಣಾಮ್ಬುಜಧಾರಿಣೀಂ ತ್ರಿನಯನಾಂ ಮೋಹಾದಿಕಾಮೇಶ್ವರೀಂ

ಮೂಕಾಮ್ಬಾಂ ಸಕಲೇಶ ಸಿದ್ಧಿವರದಾಂ ವನ್ದೇ ಪರಾಂ ದೇವತಾಮ್ || ೧೨ ||