. ದೇವೀಭುಜಙ್ಗಸ್ತೋತ್ರಮ್

.  ದೇವೀಭುಜಙ್ಗಸ್ತೋತ್ರಮ್

     (ಶ್ರೀ ಶಂಕರಾಚಾರ್ಯಕೃತಮ್)

ವಿರಿಞ್ಚ್ಯಾದಿಭಿಃ ಪಞ್ಚಭಿರ್ಲೋಕಪಾಲೈಃ

ಸಮೂಢೇ ಮಹಾನನ್ದಪೀಠೇ ನಿಷಣ್ಣಮ್ |

ಧನುರ್ಬಾಣಪಾಶಾಙ್ಕುಶಪ್ರೋತಹಸ್ತಂ

ಮಹಸ್ತ್ರೈಪುರಂ ಶಂಕರಾದ್ವೈತಮವ್ಯಾತ್ || ೧ ||

ಯದನ್ನಾದಿಭಿಃ ಪಞ್ಚಭಿಃ ಕೋಶಜಾಲೈಃ

ಶಿರಃ ಪಕ್ಷಪುಚ್ಛಾತ್ಮಕೈರನ್ತರನ್ತಃ |

ನಿಗೂಢೇ ಮಹಾಯೋಗಪೀಠೇ ನಿಷಣ್ಣಂ

ಪುರಾರೇರಥಾನ್ತಃಪುರಂ ನೌಮಿ ನಿತ್ಯಮ್ || ೨ ||

ವಿನೋದಾಯ ಚೈತನ್ಯಮೇಕಂ ವಿಭಜ್ಯ

ದ್ವಿಧಾ ದೇವಿ ಜೀವಃ ಶಿವಶ್ಚೇತಿ ನಾಮ್ನಾ |

ಶಿವಸ್ಯಾಪಿ ಜೀವತ್ವಮಾಪಾದಯನ್ತೀ

ಪುನರ್ಜೀವಮೇನಂ ಶಿವಂ ವಾ ಕರೋಷಿ || ೩ ||

ಸಮಾಕುಞ್ಚ್ಯ ಮೂಲಂ ಹೃದಿ ನ್ಯಸ್ಯ ವಾಯುಂ

ಮನೋ ಭ್ರೂಬಿಲಂ ಪ್ರಾಪಯಿತ್ವಾ ನಿವೃತ್ತಾಃ |

ತತಃ ಸಚ್ಚಿದಾನನ್ದರೂಪೇ ಪದೇ ತೇ

ಭವತ್ಯಂಬ ಜೀವಾಃ ಶಿವತ್ವೇನ ಕೇಚಿತ್ || ೪ ||

ಶರೀರೇಽತಿಕಷ್ಟೇ ರಿಪೌ ಪುತ್ರವರ್ಗೇ

ಸದಾಭೀತಿಮೂಲೇ ಕಲತ್ರೇ ಧನೇ ವಾ |

ನ ಕಶ್ಚಿದ್ವಿರಜ್ಯತ್ಯಹೋ ದೇವಿ ಚಿತ್ರಂ

ಕಥಂ ತ್ವತ್ ಕಟಾಕ್ಷಂ ವಿನಾ ತತ್ವಬೋಧಃ || ೫ ||

ಶರೀರೇ ಧನೇಽಪತ್ಯವರ್ಗೇ ಕಲತ್ರೇ

ವಿರಕ್ತಸ್ಯ ಸದ್ದೇಶಿಕಾದಿಷ್ಟಬುದ್ಧೇಃ |

ಯದಾಕಸ್ಮಿಕಂ ಜ್ಯೋತಿರಾನನ್ದರೂಪಂ

ಸಮಾಧೌ ಭವೇತ್ತತ್ತ್ವಮಸ್ಯಮ್ಬ ಸತ್ಯಮ್ || ೬ ||

ಮೃಷಾನ್ಯೋ ಮೃಷಾನ್ಯಃ ಪರೋ ಮಿಶ್ರಮೇನಂ

ಪರಃ ಪ್ರಾಕೃತಂ ಚಾಪರೋ ಬುದ್ಧಿಮಾತ್ರಮ್ |

ಪ್ರಪಞ್ಚಂ ಮಿಮೀತೇ ಮುನೀನಾಂ ಗಣೋಽಯಂ

ತದೇತತ್ತ್ವಮೇವೇತಿ ನ ತ್ವಾಂ ಜಹೀಮಃ || ೭ ||

ಕೀರ್ತಿಃ ಪ್ರತಿಷ್ಠಾ ಚ ವಿದ್ಯಾ ಚ ಶಾನ್ತಿ-

ಸ್ತಥಾ ಶಾನ್ತ್ಯತೀತೇತಿ ಪಞ್ಚೀಕೃತಾಭಿಃ |

ಕಲಾಭಿಃ ಪರೈಃ ಪಞ್ಚವಿಂಶಾತ್ಮಕಾಭಿ-

ಸ್ತ್ವಮೇಕೈವ ಸೇವ್ಯಾ ಶಿವಾಭಿನ್ನರೂಪಾ || ೮ ||

ಅಗಾಧೇಽತ್ರ ಸಂಸಾರಪಙ್ಕೇ ನಿಮಗ್ನಂ

ಕಲತ್ರಾದಿಭಾರೇಣ ಖಿನ್ನಂ ನಿತಾನ್ತಮ್ |

ಮಹಾಮೋಹಪಾಶೌಘಬದ್ಧಂ ಚಿರಾನ್ಮಾಂ

ಸಮುದ್ಧರ್ತುಮಮ್ಬ ತ್ವಮೇಕೈವ ಶಕ್ತಾ || ೯ ||

ಗಣೇಶೈರ್ಗ್ರಹೈರಮ್ಬ ನಕ್ಷತ್ರಪಙ್ಕ್ತ್ಯಾ

ತಥಾ ಯೋಗಿನೀರಾಶಿಪೀಠೈರಭಿನ್ನಮ್ |

ಮಹಾಕಾಲಮಾತ್ಮಾನಮಾಮೃಶ್ಯ ಲಕಂ

ವಿಧತ್ಸೇ ಕೃತಿಂ ವಾ ಸ್ಥಿತಿಂ ವಾ ಮಹೇಶಿ || ೧೦ ||

ಲಸತ್ತಾರಹಾರಾಮತಿಸ್ವಚ್ಛಚೇಲಾಂ

ವಹನ್ತೀಂ ಕರೇ ಪುಸ್ತಕಂ ಚಾಕ್ಷಮಾಲಾಮ್ |

ಶರಚ್ಚನ್ದ್ರಕೋಟಿಪ್ರಭಾಭಾಸುರಾಂ ತ್ವಾಂ

ಸಕೃದ್ಭಾವಯನ್ ಭಾರತೀವಲ್ಲಭಃ ಸ್ಯಾತ್ || ೧೧ ||

ಸಮುದ್ಯತ್ಸಹಸ್ರಾರ್ಕಬಿಮ್ಬಾಭವಕ್ತ್ರಾಂ

ಸ್ವಭಾಸೈವಸಿನ್ದೂರಿತಾಜಾಣ್ಡಕೋಟಿಮ್ |

ಧನುರ್ಬಾಣಪಾಶಾಙ್ಕುಶಾನ್ ಧಾರಯನ್ತೀಂ

ಸ್ಮರನ್ತಃ ಸ್ಮರಂ ಚಾಪಿ ಸಮ್ಮೋಹಯೇಯುಃ || ೧೨ ||

ಮಣಿಸ್ಯೂತತಾಟಙ್ಕಶೋಣಾಸ್ಯಬಿಮ್ಬಾಂ

ತಡಿತ್ಪೀತವಸ್ತ್ರಾಂ ತ್ವಗುಲ್ಲಾಸಿಭೂಷಾಮ್ |

ಸದಾ ಭಾವಯನ್ ತಪ್ತಹೇಮಪ್ರಭಾಂ ತ್ವಾಂ

ಶ್ರಿಯೋ ನಾಶಯತ್ಯಮ್ಬ ಚಾಞ್ಚಲ್ಯಭಾವಮ್ || ೧೩ ||

ಮಹಾಮನ್ತ್ರರಾಜಾನ್ತಬೀಜಂ ಪರಾಖ್ಯಂ

ಸ್ವತೋ ನ್ಯಸ್ತಬಿನ್ದುಂ ಸ್ವಯಂ ನ್ಯಸ್ತ ಹಾರ್ದಮ್ |

ಭವದ್ವಕ್ತ್ರವಕ್ಷೋಜಗುಹ್ಯಾಭಿಧಾನಂ

ಸ್ವರೂಪಂ ಸಕೃದ್ಭಾವಯೇತ್ಸತ್ವಮೇವ || ೧೪ ||

ತಥಾನ್ಯೇ ವಿಕಲ್ಪೇಷು ನಿರ್ವಿಣ್ಣಚಿತ್ತಾಃ

ತದೇವಂ ಸಮಾಧಾಯ ಬಿನ್ದುತ್ರಯಂ ತೇ |

ಪರಾನನ್ದಸಂಧಾನಸಿನ್ಧೌ ನಿಮಗ್ನಾಃ

ಪುನರ್ಗರ್ಭರನ್ಧ್ರಂ ನ ಪಶ್ಯನ್ತಿ ಧೀರಾಃ || ೧೫ ||

ತ್ವದುನ್ಮೇಷಲೀಲಾನುಬನ್ಧಾಧಿಕಾರಾನ್

ವಿರಿಞ್ಚ್ಯಾದಿಕಾಂಸ್ತ್ವದ್ಗುಣಾಮ್ಭೋಧಿಬಿನ್ದೂನ್ |

ಭಜನ್ತಸ್ತಿತೀರ್ಷನ್ತಿ ಸಂಸಾರಸಿನ್ಧುಂ

ಶಿವೇ ತಾವಕಾನಾಂ ಸುಸಮ್ಭಾವನೇಯಮ್ || ೧೬ ||

ಕದಾ ವಾ ಭವತ್ಪಾದಪೋತೇನ ತೂರ್ಣಂ

ಭವಾಮ್ಭೋಧಿಮುತ್ತೀರ್ಯ ಪೂರ್ಣಾನ್ತರಙ್ಗಃ |

ನಿಮಜ್ಜನ್ತಮೇನಂ ದುರಾಶಾವಿಷಾಬ್ಧೌ

ಸಮಾಲೋಕ್ಯ ಲೋಕಂ ಕಥಂ ಪರ್ಯುದಾಸ್ಸೇ || ೧೭ ||

ಕದಾ ವಾ ಹೃಷೀಕಾಣಿ ಸಾಮ್ಯಂ ಭಜೇಯುಃ

ಕದಾ ವಾ ನ ಶತ್ರುರ್ನ ಮಿತ್ರಂ ಭವಾನಿ |

ಕದಾ ವಾ ದುರಾಶಾ ವಿಷೂಚೀ ವಿಲೋಪಃ

ಕದಾ ವಾ ಮನೋ ಮೇ ಸಮೂಲಂ ವಿನಶ್ಯೇತ್ || ೧೮ ||

ನಮೋವಾಕಮಾಶಾಸ್ಮಹೇ ದೇವಿ ಯುಷ್ಮತ್-

ಪದಾಮ್ಭೋಜಯುಗ್ಮಾಯ ತಿಗ್ಮಾಯ ಗೌರಿ |

ವಿರಿಞ್ಚ್ಯಾದಿಭಾಸ್ವತ್ಕಿರೀಟಪ್ರತೋಲೀ-

ಪ್ರದೀಪಪ್ರತಾನಪ್ರಭಾಭಾಸ್ವರಾಯ || ೧೯ ||

ಕಚೇ ಚನ್ದ್ರರೇಖಂ ಕುಚೇ ತಾರಹಾರಂ

ಕರೇ ಸ್ವಾದು ಚಾಪಂ ಶರೇ ಷಟ್ಪದೌಘಮ್ |

ಸ್ಮರಾಮಿ ಸ್ಮರಾರೇರಭಿಪ್ರಾಯಮೇಕಂ

ಮದಾಘೂರ್ಣನೇತ್ರಂ ಮದೀಯಂ ನಿಧಾನಮ್ || ೨೦ ||

ಶರೇಷ್ವೇವ ನಾಸಾ ಧನುಷ್ವೇವ ಜಿಹ್ವಾ

ಜಪಾಪಾಟಲೇ ಲೋಚನೇ ತೇ ಸ್ವರೂಪೇ |

ತ್ವಗೇಷ ಭವಚ್ಚನ್ದ್ರಖಣ್ಡೇ ಶ್ರವೋ ಮೇ

ಗುಣೇ ತೇ ಮನೋವೃತಿರಮ್ಬ ತ್ವಯಿ ಸ್ಯಾತ್ || ೨೧ ||

ಜಗತ್ಕರ್ಮಧೀರಾನ್ ವಚೋಧೂತಕೀರಾನ್

ಕುಚನ್ಯಸ್ತಹಾರಾನ್ ಕೃಪಾಸಿನ್ಧುಪೂರಾನ್ |

ಭವಾಮ್ಭೋಧಿಪಾರಾನ್ ಮಹಾಪಾಪದೂರಾನ್

ಭಜೇ ವೇದಸಾರಾನ್ ಶಿವಪ್ರೇಮದಾರಾನ್ || ೨೨ ||

ಸುಧಾಸಿನ್ಧುಸಾರೇ ಚಿದಾನನ್ದನೀರೇ

ಸಮುತ್ಫುಲ್ಲನೀಪೇ ಸುರತ್ನಾನ್ತರೀಪೇ |

ಮಣಿವ್ಯೂಹಸಾಲೇ ಸ್ಥಿತೇ ಹೈಮಶಾಲೇ

ಮನೋಜಾರಿವಾಮೇ ನಿಷಣ್ಣಂ ಮನೋ ಮೇ || ೨೩ ||

ದೃಗನ್ತೇ ವಿಲೋಲಾ ಸುಗನ್ಧೀಷುಮಾಲಾ

ಪ್ರಪಞ್ಚೇನ್ದ್ರಜಾಲಾ ವಿಪತ್ಸಿನ್ಧುಕೂಲಾ |

ಮುನಿಸ್ವಾನ್ತಶಾಲಾ ನಮಲ್ಲೋಕಪಾಲಾ

ಹೃದಿ ಪ್ರೇಮಲೋಲಾಽಮೃತಸ್ವಾದುಲೀಲಾ || ೨೪ ||

ಜಗಜ್ಜಾಲಮೇತತ್ತ್ವಯೈವಾಮ್ಬ ಸೃಷ್ಟಂ

ತ್ವಮೇವಾದದಾಸೀನ್ದ್ರಿಯೈರರ್ಥಜಾಲಮ್ |

ತ್ವಮೇಕೈವಕರ್ತ್ರೀ ತ್ವಮೇಕೈವಭೋಕ್ತ್ರೀ

ನ ಮೇ ಪುಣ್ಯಪಾಪೇ ನ ಮೇ ಬನ್ಧಮೋಕ್ಷೌ || ೨೫ ||

ಇತಿ ಪ್ರೇಮಭಾರೇಣ ಕಿಞ್ಚಿನ್ಮಯೋಕ್ತಂ

ನ ಬುದ್ಧ್ವೈವ ತತ್ತ್ವಂ ಮದೀಯಂ ತ್ವದೀಯಮ್ |

ವಿನೋದಾಯ ಬಾಲಸ್ಯ ಮೌರ್ಖ್ಯಂ ಹಿ ಮಾತಃ

ತದೇತತ್ ಪ್ರಲಾಪಸ್ತುತಿಂ ಮೇ ಗೃಹಾಣ || ೨೬