ಕಲ್ಯಾಣವೃಷ್ಟಿಸ್ತವಃ

ಕಲ್ಯಾಣವೃಷ್ಟಿಸ್ತವಃ

     (ಶ್ರೀ ಶಂಕರಾಚಾರ್ಯಕೃತಂ) 

 

ಕಲ್ಯಾಣವೃಷ್ಟಿಭಿರಿವಾಮೃತಪೂರಿತಾಭಿಃ

ಲಕ್ಷ್ಮೀಸ್ವಯಂವರಣ ಮಂಗಲದೀಪಿಕಾಭಿಃ |

ಸೇವಾಭಿರಮ್ಬ ತವ ಪಾದಸರೋಜಮೂಲೇ

ನಾಕಾರಿ ಕಿಂ ಮನಸಿ ಭಾಗ್ಯವತಾಂ ಜನಾನಾಮ್ || ೧ ||

ಏತಾವದೇವ ಜನನಿ ಸ್ಪೃಹಣೀಯಮಾಸ್ತೇ

ತ್ವದ್ವನ್ದನೇಷು ಸಲಿಲಸ್ಥಗಿತೇ ಚ ನೇತ್ರೇ |

ಸಾನ್ನಿಧ್ಯಮುದ್ಯದರುಣಾಯುತಸೋದರಸ್ಯ

ತ್ವದ್ವಿಗ್ರಹಸ್ಯ ಪರಯಾ ಸುಧಯಾಪ್ಲುತಸ್ಯ || ೨ ||

ಈಶತ್ವನಾಮಕಲುಷಾಃ ಕತಿ ವಾ ನ ಸನ್ತಿ

ಬ್ರಹ್ಮಾದಯಃ ಪ್ರತಿಭವಂ ಪ್ರಲಯಾಭಿಭೂತಾಃ |

ಏಕಃ ಸ ಏವ ಜನನಿ ಸ್ಥಿರಸಿದ್ಧಿರಾಸ್ತೇ

ಯಃ ಪಾದಯೋಸ್ತವ ಸಕೃತ್ಪ್ರಣತಿಂ ಕರೋತಿ || ೩ ||

ಲಬ್ಧ್ವಾ ಸಕೃತ್ ತ್ರಿಪುರಸುನ್ದರಿ ತಾವಕೀನಂ

ಕಾರುಣ್ಯಕನ್ದಲಿತ ಕಾನ್ತಿಭರಂ ಕಟಾಕ್ಷಮ್ |

ಕನ್ದರ್ಪಕೋಟಿಸುಭಗಾಸ್ತ್ವಯಿ ಭಕ್ತಿಭಾಜಃ

ಸಮ್ಮೋಹಯನ್ತಿ ತರುಣೀರ್ಭುವನತ್ರಯೇಽಪಿ || ೪ ||

ಹ್ರೀಂಕಾರಮೇವ ತವ ನಾಮ ಗೃಣನ್ತಿ ವೇದಾಃ

ಮಾತಸ್ತ್ರಿಕೋಣನಿಲಯೇ ತ್ರಿಪುರೇ ತ್ರಿನೇತ್ರೇ |

ತ್ವತ್ಸಂಸ್ಮೃತೌ ಯಮಭಟಾಭಿಭವಂ ವಿಹಾಯ

ದೀವ್ಯನ್ತಿ ನನ್ದನವನೇ ಸಹ ಲೋಕಪಾಲೈಃ || ೫ ||

ಹನ್ತುಃ ಪುರಮಧಿಗಲಂ ಪರಿಪೀಯಮಾನಃ

ಕ್ರೂರಃ ಕಥಂ ನ ಭವಿತಾ ಗರಲಸ್ಯ ವೇಗಃ |

ನಾಶ್ವಾಸನಾಯ ಯದಿ ಮಾತರಿದಂ ತವಾರ್ಧಂ

ದೇಹಸ್ಯ ಶಶ್ವದಮೃತಾಪ್ಲುತಶೀತಲಸ್ಯ || ೬ ||

ಸರ್ವಜ್ಞತಾಂ ಸದಸಿ ವಾಕ್ಪಟುತಾಂ ಪ್ರಸೂತೇ

ದೇವಿ ತ್ವದಙ್ಘ್ರಿ ಸರಸೀರುಹಯೋ ಪ್ರಣಾಮಃ |

ಕಿಂ ಚ ಸ್ಫುರನ್ಮಕುಟಮುಜ್ಜ್ವಲಮಾತಪತ್ರಂ

ದ್ವೇ ಚಾಮರೇ ಚ ಮಹತೀಂ ವಸುಧಾಂ ದದಾತಿ || ೭ ||

ಕಲ್ಪದ್ರುಮೈರಭಿಮತಪ್ರತಿಪಾದನೇಷು

ಕಾರುಣ್ಯವಾರಿಧಿಭಿರಮ್ಬ ಭವತ್ಕಟಾಕ್ಷೈಃ |

ಆಲೋಕಯ ತ್ರಿಪುರಸುನ್ದರಿ ಮಮನಾಥಮ್

ತ್ವಯ್ಯೇವ ಭಕ್ತಿಭರಿತಂ ತ್ವಯಿ ಬದ್ಧತೃಷ್ಣಮ್ || ೮ ||

ಹನ್ತೇತರೇಷ್ವಪಿ ಮನಾಂಸಿ ನಿಧಾಯ ಚಾನ್ಯೇ

ಭಕ್ತಿಂ ವಹನ್ತಿ ಕಿಲ ಪಾಮರದೈವತೇಷು |

ತ್ವಾಮೇವ ದೇವಿ ಮನಸಾ ಸಮನುಸ್ಮರಾಮಿ

ತ್ವಾಮೇವ ನೌಮಿ ಶರಣಂ ಜನನಿ ತ್ವಮೇವ || ೯ ||

ಲಕ್ಷ್ಯೇಷು ಸತ್ಸ್ವಪಿ ಕಟಾಕ್ಷನಿರೀಕ್ಷಣಾನಾಂ

ಆಲೋಕಯ ತ್ರಿಪುರಸುನ್ದರಿ ಮಾಂ ಕದಾಚಿತ್ |

ನೂನಂ ಮಯಾ ತು ಸದೃಶಃ ಕರುಣೈಕಪಾತ್ರಂ

ಜಾತೋ ಜನಿಷ್ಯತಿ ಜನೋ ನ ಚ ಜಾಯತೇ  ವಾ || ೧೦ ||

ಹ್ರೀಂ ಹ್ರೀಮಿತಿ ಪ್ರತಿದಿನಂ ಜಪತಾಂ ತವಾಖ್ಯಾಂ

ಕಿಂ ನಾಮ ದುರ್ಲಭಮಿಹ ತ್ರಿಪುರಾಧಿವಾಸೇ |

ಮಾಲಾಕಿರೀಟಮದವಾರಣಮಾನನೀಯಾ

ತಾನ್ ಸೇವತೇ ವಸುಮತೀ ಸ್ವಯಮೇವ ಲಕ್ಷ್ಮೀಃ || ೧೧ ||

ಸಂಪತ್ಕರಾಣಿ ಸಕಲೇನ್ದ್ರಿಯನನ್ದನಾನಿ

ಸಾಮ್ರಾಜ್ಯದಾನನಿರತಾನಿ ಸರೋರುಹಾಕ್ಷಿ |

ತ್ವದ್ವನ್ದನಾನಿ ದುರಿತಾಹರಣೋದ್ಯತಾನಿ

ಮಾಮೇವ ಮಾತರನಿಶಂ ಕಲಯನ್ತು ನಾನ್ಯಮ್ || ೧೨ ||

ಕಲ್ಪೋಪಸಂಹೃತಿಷು ಕಲ್ಪಿತತಾಣ್ಡವಸ್ಯ

ದೇವಸ್ಯ ಖನ್ಡಪರಶೋಃ ಪರಭೈರವಸ್ಯ |

ಪಾಶಾಙ್ಕುಶೈಕ್ಷವಶರಾಸನಪುಷ್ಪಬಾಣಾ

ಸಾ ಸಾಕ್ಷಿಣೀ ವಿಜಯತೇ ತವ ಮೂರ್ತಿರೇಕಾ || ೧೩ ||

ಲಗ್ನಂ ಸದಾ ಭವತು ಮಾತರಿದಂ ತವಾರ್ಧಂ

ತೇಜಃ ಪರಂ ಬಹುಲಕುಙ್ಕುಮಪಙ್ಕಶೋಣಮ್ |

ಭಾಸ್ವತ್ಕಿರೀಟಮಮೃತಾಂಶುಕಲಾವತಂಸಂ

ಮಧೇ ತ್ರಿಕೋಣನಿಲಯಂ ಪರಮಾಮೃತಾರ್ದ್ರಮ್ || ೧೪ ||

ಹ್ರೀಂಕಾರಮೇವ ತವ ನಾಮ ತದೇವ ರೂಪಂ

ತ್ವನ್ನಾಮ ದುರ್ಲಭಮಿಹ  ತ್ರಿಪುರೇ ಗೃಣನ್ತಿ |

ತ್ವತ್ತೇಜಸಾ ಪರಿಣತಂ ವಿಯದಾದಿಭೂತಂ

ಸೌಖ್ಯಂ ತನೋತಿ ಸರಸೀರುಹಸಂಭವಾದೇಃ || ೧೫ ||

ಹ್ರೀಂಕಾರತ್ರಯಸಂಪುಟೇನ ಮಹತಾ ಮನ್ತ್ರೇಣ ಸಂದೀಪಿತಂ

ಸ್ತೋತ್ರಂ ಯಃ ಪ್ರತಿವಾಸರಂ ತವ ಪುರೋ ಮಾತರ್ಜಪೇನ್ಮನ್ತ್ರವಿತ್ |

ತಸ್ಯ ಕ್ಷೋಣಿಭುಜೋ ಭವನ್ತಿ ವಶಗಾ ಲಕ್ಷ್ಮೀಶ್ಚಿರಸ್ಥಾಯಿನೀ

ವಾಣೀ ನಿರ್ಮಲಸೂಕ್ತಿಭಾರಭರಿತಾ ಜಾಗರ್ತಿ ದೀರ್ಘಂ ವಯಃ || ೧೬ ||