ಗೌರೀಪತಿ ಸಂಕೀರ್ತನಮ್

ಗೌರೀಪತಿ ಸಂಕೀರ್ತನಮ್ 

ಗೌರೀಪತೇ ಜಯ ಗೌರೀಪತೇ ಜಯ |

ಗೌರೀಪತೇ ಜಯ ಗೌರೀಪತೇ  ||

     ---

ಸನ್ತತಶೋಭನ ಸಂಸಾರಭಞ್ಜನ|

ಸನ್ತೋಷಭಾಷಣ ಪಾಲಯ ಮಾಮ್ || ೧||   (ಗೌರೀ…)

ಅಂಗಜಚಾರುಶರೀರವಿನಾಶನ|

ಪುಙ್ಗವಕೇತನ ಪಾಲಯ ಮಾಮ್ || ೨||  (ಗೌರೀ…)

ಅನ್ತಕನಾಶನಾಹನ್ತಾವಿನಾಶನ|

ಸಿನ್ಧುರನಾಶನ ಪಾಲಯ ಮಾಮ್ || ೩||  (ಗೌರೀ…)

ಗಙ್ಗಾತರಙ್ಗಭುಜಙ್ಗವಿಭೂಷಣ

ಶೃಂಗಾರೋಜ್ಜ್ವಲ ಪಾಲಯ ಮಾಮ್ || ೪||  (ಗೌರೀ…)

ಪಾರ್ವತಿವಲ್ಲಭ ಪಾಪವಿಮೋಚನ

ಸಕಲಾನನ್ದ ಪಾಲಯ ಮಾಮ್ || ೫||  (ಗೌರೀ…)

ಬಾಲೇನ್ದುಮಣ್ಡನ ಫಾಲವಿಲೋಚನ

ನೀಲಕಣ್ಠೇಶ್ವರ ಪಾಲಯ ಮಾಮ್ || ೬||  (ಗೌರೀ…)

ದಕ್ಷಾಧ್ವರಾನ್ತಕ ದಾಕ್ಷಾಯಣೀನಾಥ

ದಕ್ಷಿಣಾಮೂರ್ತೇ ಪಾಲಯ ಮಾಮ್ || ೭||    (ಗೌರೀ…)

ಕಾರುಣ್ಯಸಾಗರ ಕಾಮದಾಯಿನ್ ಪರ್-

ಮಾನನ್ದರೂಪ ನಮಾಮಿ ಶಂಭೋ  || ೮||  (ಗೌರೀ…)

ನಿಷ್ಕಲ ನಿರ್ಮಲ ನಿತ್ಯ ನಿರಞ್ಜನ|

ನಿಷ್ಕಲಙ್ಕಾತ್ಮನ್ ನಮಾಮಿ ವಿಭೋ || ೯||  (ಗೌರೀ…)

ರಾಜಶಿಖಾಮಣೇ ತೇಜೋನಿಧೇ ತ್ಯಾಗ-

ರಾಜಮಹೇಶ ನಮಾಮಿ ಶಮ್ಭೋ    || ೧೦||  (ಗೌರೀ…)

ಭಕ್ತಪ್ರಿಯ ಶಿವ ಶಂಕರ ಚಿನ್ಮಯ

ಬ್ರಹ್ಮಸ್ವರೂಪ ನಮಾಮಿ ವಿಭೋ  || ೧೧||   (ಗೌರೀ…)

ಯೋಗಿಜನಾಶ್ರಯ ರೋಗವಿನಾಶನ|

ಭೋಗಿವಿಭೂಷ ನಮಾಮಿ ಶಂಭೋ || ೧೨||  (ಗೌರೀ…)

ಸಂಸಾರಭಞ್ಜನ ಕಂಸಾರಿರಞ್ಜನ|

ಹಂಸಾದ್ಯಗಮ್ಯ ನಮಾಮಿ ವಿಭೋ || ೧೩||  (ಗೌರೀ…)

ಆಧಿವಿನಾಶನ ವ್ಯಾಧಿವಿನಾಶನ|

ಸ್ವಾಧೀನಮೋಕ್ಷ ನಮಾಮಿ ವಿಭೋ || ೧೪||  (ಗೌರೀ…)

ಪಙ್ಕಜಬಾಣಭಯಂಕರ ಶಙ್ಕರ|

ಪಙ್ಕವಿಹೀನ ನಮಾಮಿ ವಿಭೋ || ೧೫|| (ಗೌರೀ…)

ಅನ್ತಾದ್ಯಹೀನ ಸದನ್ತರಂಗಸ್ಥಿತ|

ಸನ್ತತಂ ಕಾನ್ತ ನಮಾಮಿ ವಿಭೋ || ೧೬|| (ಗೌರೀ…)

ಗೌರೀಪತೇ ಜಯ ಗೌರೀಪತೇ ಜಯ |

ಗೌರೀಪತೇ ಜಯ ಗೌರೀಪತೇ  ||