ಗಣಪತ್ಯಥರ್ವಶೀರ್ಷಸ್ತೋತ್ರಮ್

            ಗಣಪತ್ಯಥರ್ವಶೀರ್ಷಸ್ತೋತ್ರಮ್

  

  (ಊಂ ಭದ್ರಂ ಕರ್ಣೇಭಿಃ ಶೃಣುಯಾಮ ದೇವಾ……)

ಊಂ  ನಮಸ್ತೇ ಗಣಪತಯೇ| ತ್ವಮೇವ ಪ್ರತ್ಯಕ್ಷಂ ತತ್ತ್ವಮಸಿ| ತ್ವಮೇವ ಕೇವಲಂ ಕರ್ತಾಸಿ|

ತ್ವಮೇವ ಕೇವಲಂ ಭರ್ತಾಸಿ| ತ್ವಮೇವ ಕೇವಲಂ ಹರ್ತಾಸಿ| ತ್ವಮೇವ ಸರ್ವಂ ಖಲ್ವಿದಂ ಬ್ರಹ್ಮಾಸಿ|

ತ್ವಂ ಸಾಕ್ಷಾದಾತ್ಮಾಸಿ ನಿತ್ಯಮ್ ||೧||

ಋತಂ ವಚ್ಮಿ| ಸತ್ಯಂ ವಚ್ಮಿ||೨||

ಅವ ತ್ವಂ ಮಾಮ್| ಅವ ವಕ್ತಾರಮ್| ಅವ ಶ್ರೋತಾರಮ್| ಅವ ದಾತಾರಮ್| ಅವ ಧಾತಾರಮ್|

ಅವಾನೂಚಾನಮ್ | ಅವ ಶಿಷ್ಯಮ್ | ಅವ ಪಶ್ಚಾತ್ತಾತ್ | ಅವ ಪುರಸ್ತಾತ್| ಅವ ಉತ್ತರಾತ್ತಾತ್|

ಅವ ದಕ್ಷಿಣಾತ್ತಾತ್| ಅವ ಚೋರ್ಧ್ವಾತ್ತಾತ್| ಅವಾಧರಾತ್ತಾತ್| ಸರ್ವತೋ ಮಾಂ ಪಾಹಿ ಪಾಹಿ ಸಮನ್ತಾತ್||೩||

ತ್ವಂ ವಾಙ್ಮಯಸ್ತ್ವಂ ಚಿನ್ಮಯಃ| ತ್ವಮಾನನ್ದಮಯಸ್ತ್ವಂ ಬ್ರಹ್ಮಮಯಃ |ತ್ವಂ  ಸಚ್ಚಿದಾನನ್ದಾದ್ವಿತೀಯೋಽಸಿ | ತ್ವಂ ಪ್ರತ್ಯಕ್ಷಂ ಬ್ರಹ್ಮಾಸಿ| ತ್ವಂ ಜ್ಞಾನಮಯೋ ವಿಜ್ಞಾನಮಯೋಽಸಿ||೪||

ಸರ್ವಂ ಜಗದಿದಂ ತ್ವತ್ತೋ ಜಾಯತೇ| ಸರ್ವಂ ಜಗದಿದಂ ತ್ವತ್ತಸ್ತಿಷ್ಠತಿ| ಸರ್ವಂ ಜಗದಿದಂ ತ್ವಯಿ ಲಯಮೇಷ್ಯತಿ| ಸರ್ವಂ ಜಗದಿದಂ ತ್ವಯಿ ಪ್ರತ್ಯೇತಿ| ತ್ವಂ ಭೂಮಿರಾಪೋಽನಲೋಽನಿಲೋ ನಭಃ|

ತ್ವಂ ಚತ್ವಾರಿ ವಾಕ್ಪದಾನಿ ||೫||

ತ್ವಂ ಗುಣತ್ರಯಾತೀತಃ| ತ್ವಂ ದೇಹತ್ರಯಾತೀತಃ| ತ್ವಂ ಕಾಲತ್ರಯಾತೀತಃ| ತ್ವಂ ಮೂಲಾಧಾರಸ್ಥಿತೋಽಸಿ ನಿತ್ಯಮ್| ತ್ವಂ ಶಕ್ತಿತ್ರಯಾತ್ಮಕಃ | ತ್ವಾಂ ಯೋಗಿನೋ ಧ್ಯಾಯನ್ತಿ ನಿತ್ಯಮ್ | ತ್ವಂ ಬ್ರಹ್ಮಾ ತ್ವಂ ವಿಷ್ಣುಸ್ತ್ವಂ ರುದ್ರಸ್ತ್ವಮಿನ್ದ್ರಸ್ತ್ವಮಗ್ನಿಸ್ತ್ವಂ ವಾಯುಸ್ತ್ವಂ ಸೂರ್ಯಸ್ತ್ವಂ ಚಂದ್ರಮಾಸ್ತ್ವಂ ಬ್ರಹ್ಮ ಭೂರ್ಭುವಃ

ಸ್ವರೋಮ್ ||೬||

ಗಣಾದಿಂ ಪೂರ್ವಮುಚ್ಚಾರ್ಯ ವರ್ಣಾದೀಂಸ್ತದನನ್ತರಮ್| ಅನುಸ್ವಾರಃ ಪರತರಃ| ಅರ್ಧೇನ್ದುಲಸಿತಂ| ತಾರೇಣ ಋದ್ಧಮ್| ಏತಏವ ಮನುಸ್ವರೂಪಮ್ ||೭||

ಗಕಾರಃ ಪೂರ್ವರೂಪಮ್| ಅಕಾರೋ ಮಧ್ಯಮರೂಪಮ್| ಅನುಸ್ವಾರಶ್ಚಾನ್ತ್ಯರೂಪಮ್| ಬಿನ್ದುರುತ್ತರೂಪಮ್|

ನಾದಃ ಸನ್ಧಾನಮ್ | ಸಂಹಿತಾ ಸನ್ಧಿಃ| ಸೈಷಾ ಗಣೇಶವಿದ್ಯಾ| ಗಣಕಃ ಋಷಿಃ | ನಿಚೃದ್ಗಾಯತ್ರೀ- ಚ್ಛನ್ದಃ| ಗಣಪತಿರ್ದೇವತಾ |  ಊಂ ಗಂ ಗಣಪತಯೇ ನಮಃ ||೭||

ಏಕದನ್ತಾಯ ವಿದ್ಮಹೇ ವಕ್ರತುಣ್ಡಾಯ ಧೀಮಹಿ| ತನ್ನೋ ದನ್ತಿಃ ಪ್ರಚೋದಯಾತ್ ||೮||

ಏಕದನ್ತಂ ಚತುರ್ಹಸ್ತಂ ಪಾಶಮಙ್ಕುಶಧಾರಿಣಮ್|

ರದಂ ಚ ವರದಂ ಹಸ್ತೈರ್ಬಿಭ್ರಾಣಂ ಮೂಷಕಧ್ವಜಮ್||

ರಕ್ತಂ ಲಮ್ಬೋದರಂ ಶೂರ್ಪಕರ್ಣಕಂ ರಕ್ತವಾಸಸಮ್|

ರಕ್ತಗನ್ಧಾನುಲಿಪ್ತಾಙ್ಗಂ ರಕ್ತಪುಷ್ಪೈಃ ಸುಪೂಜಿತಮ್||

ಭಕ್ತಾನುಕಮ್ಪಿನಂ ದೇವಂ ಜಗತ್ಕಾರಣಮಚ್ಯುತಮ್|

ಆವಿರ್ಭೂತಂ ಚ ಸೃಷ್ಟ್ಯಾದೌ ಪ್ರಕೃತೇಃ ಪುರುಷಾತ್ಪರಮ್||

ಏವಂ ಧ್ಯಾಯತಿ ಯೋ ನಿತ್ಯಂ ಸ ಯೋಗೀ ಯೋಗಿನಾಂ ವರಃ||೯||

ನಮೋ ವ್ರಾತಪತಯೇ| ನಮೋ ಗಣಪತಯೇ| ನಮಃ ಪ್ರಮಥಪತಯೇ| ನಮಸ್ತೇಽಸ್ತು ಲಮ್ಬೋದರಾಯೈಕದನ್ತಾಯ ವಿಘ್ನನಾಶಿನೇ ಶಿವಸುತಾಯ ಶ್ರೀವರದಮೂರ್ತಯೇ ನಮಃ ||೧೦||

ಏತದಥರ್ವಶೀರ್ಷಂ ಯೋಽಧೀತೇ | ಸ ಬ್ರಹ್ಮಭೂಯಾಯ ಕಲ್ಪತೇ | ಸ ಸರ್ವವಿಘ್ನೈರ್ನ ಬಾಧ್ಯತೇ

ಸ ಸರ್ವತ್ರ ಸುಖಮೇಧತೇ| ಸ ಸರ್ವಮಹಾಪಾಪಾತ್ ಪ್ರಮುಚ್ಯತೇ| ಸಾಯಮಧೀಯಾನೋ ದಿವಸಕೃತಂ ಪಾಪಂ ನಾಶಯತಿ|  ಪ್ರಾತರಧೀಯಾನೋ ರಾತ್ರಿಕೃತಂ ಪಾಪಂ ನಾಶಯತಿ| ಸಾಯಂ ಪ್ರಾತಃ ಪ್ರಯುಞ್ಜಾನೋಽಪಾಪೋ ಭವತಿ| ಸರ್ವತ್ರಾಧೀಯಾನೋಽಪವಿಘ್ನೋ ಭವತಿ| ಧರ್ಮಾರ್ಥಕಾಮಮೋಕ್ಷಂ ಚ ವಿನ್ದತಿ|

ಇದಮಥರ್ವಶೀರ್ಷಮಶಿಷ್ಯಾಯ ನ ದೇಯಮ್| ಯೋ ಯದಿ ಮೋಹಾತ್ ದಾಸ್ಯತಿ ಸ ಪಾಪೀಯಾನ್ ಭವತಿ|

ಸಹಸ್ರಾವರ್ತನಾದ್ ಯಂ ಯಂ ಕಾಮಮಧೀತೇ ತಂ ತಮನೇನ ಸಾಧಯೇತ್ ||೧೧||

                  

ಅನೇನ ಗಣಪತಿಮಭಿಷಿಞ್ಚತಿ ಸ ವಾಗ್ಮೀ ಭವತಿ| ಚತುರ್ಥ್ಯಾಮನಶ್ನನ್ ಜಪತಿ ಸ ವಿದ್ಯಾವಾನ್ ಭವತಿ| ಇತ್ಯಥರ್ವಣವಾಕ್ಯಮ್| ಬ್ರಹ್ಮಾದ್ಯಾವರಣಂ ವಿದ್ಯಾನ್ನ ಬಿಭೇತಿ ಕದಾಚನೇತಿ ||೧೨||

ಯೋ ದೂರ್ವಾಙ್ಕುರೈರ್ಯಜತಿ ಸ ವೈಶ್ರವಣಸಮೋ ಭವತಿ| ಯೋ ಲಾಜೈರ್ಯಜತಿ ಸ ಯಶೋವಾನ್ ಭವತಿ, ಸ ಮೇಧಾವಾನ್ ಭವತಿ| ಯೋ ಮೋದಕಸಹಸ್ರೇಣ ಯಜತಿ ಸ ವಾಞ್ಛಿತಫಲಮವಾಪ್ನೋತಿ| ಯ಼್ಅಃ ಸಾಜ್ಯಸಮಿದ್ಭಿರ್ಯಜತಿ ಸ ಸರ್ವಂ ಲಭತೇ ಸ ಸರ್ವಂ ಲಭತೇ |

ಅಷ್ಟೌ ಬ್ರಾಹ್ಮಣಾನ್ ಸಮ್ಯಗ್ ಗ್ರಾಹಯಿತ್ವಾ ಸೂರ್ಯವರ್ಚಸ್ವೀ ಭವತಿ| ಸೂರ್ಯಗ್ರಹೇ ಮಹಾನದ್ಯಾಂ ಪ್ರತಿಮಾಸನ್ನಿಧೌ ವಾ ಜಪ್ತ್ವಾ ಸಿದ್ಧಮನ್ತ್ರೋ ಭವತಿ| ಮಹಾವಿಘ್ನಾತ್ ಪ್ರಮುಚ್ಯತೇ| ಮಹಾದೋಷಾತ್ ಪ್ರಮುಚ್ಯತೇ| ಮಹಾಪ್ರತ್ಯವಾಯಾತ್ ಪ್ರಮುಚ್ಯತೇ | ಸ ಸರ್ವವಿದ್ಭವತಿ | ಸ ಸರ್ವವಿದ್ಭವತಿ | ಯ ಏವಂ ವೇದ|  ಇತ್ಯುಪನಿಷತ್||೧೩||

            (ಊಂ ಸಹನಾವವತು…..)