ಮಧುರಾಷ್ಟಕಮ್

                ಮಧುರಾಷ್ಟಕಮ್

         (ವಲ್ಲಭಾಚಾರ್ಯಕೃತಮ್)

ಅಧರಂ ಮಧುರಂ ವದನಂ ಮಧುರಂ ನಯನಂ ಮಧುರಂ ಹಸಿತಂ ಮಧುರಮ್ |

ಹೃದಯಂ ಮಧುರಂ ಗಮನಂ ಮಧುರಂ ಮಥುರಾಧಿಪತೇರಖಿಲಂ ಮಧುರಮ್ || ೧ ||

ವಚನಂ ಮಧುರಂ ಚರಿತಂ ಮಧುರಂ ವಸನಂ ಮಧುರಂ ವಲಿತಂ ಮಧುರಮ್ |

ಚಲಿತಂ ಮಧುರಂ ಭ್ರಮಿತಂ ಮಧುರಂ ಮಥುರಾಧಿಪತೇರಖಿಲಂ ಮಧುರಮ್ || ೨ ||

ವೇಣುರ್ಮಧುರೋ ರೇಣುರ್ಮಧುರಃ ಪಾಣಿರ್ಮಧುರಃ ಪಾದೌ ಮಧುರೌ |

ನೃತ್ಯಂ ಮಧುರಂ ಸಖ್ಯಂ ಮಧುರಂ ಮಥುರಾಧಿಪತೇರಖಿಲಂ ಮಧುರಮ್ || ೩ ||

ಗೀತಂ ಮಧುರಂ ಪೀತಂ ಮಧುರಂ ಭುಕ್ತಂ ಮಧುರಂ ಸುಪ್ತಂ ಮಧುರಮ್ |

ರೂಪಂ ಮಧುರಂ ತಿಲಕಂ ಮಧುರಂ ಮಥುರಾಧಿಪತೇರಖಿಲಂ ಮಧುರಮ್ || ೪ ||

ಕರಣಂ ಮಧುರಂ ತರಣಂ ಮಧುರಂ ಹರಣಂ ಮಧುರಂ ರಮಣಂ ಮಧುರಮ್ |

ವಮಿತಂ ಮಧುರಂ ಶಮಿತಂ ಮಧುರಂ ಮಥುರಾಧಿಪತೇರಖಿಲಂ ಮಧುರಮ್ || ೫ ||

ಗುಞ್ಜಾ ಮಧುರಾ ಮಾಲಾ ಮಧುರಾ ಯಮುನಾ ಮಧುರಾ ವೀಚೀ ಮಧುರಾ |

ಸಲಿಲಂ ಮಧುರಂ ಕಮಲಂ ಮಧುರಂ ಮಥುರಾಧಿಪತೇರಖಿಲಂ ಮಧುರಮ್ || ೬ ||

ಗೋಪೀ ಮಧುರಾ ಲೀಲಾ ಮಧುರಾ ಯುಕ್ತಂ ಮಧುರಂ ಮುಕ್ತಂ ಮಧುರಮ್ |

ದೃಷ್ಟಂ ಮಧುರಂ ಶಿಷ್ಟಂ ಮಧುರಂ ಮಥುರಾಧಿಪತೇರಖಿಲಂ ಮಧುರಮ್ || ೭ ||

ಗೋಪಾ ಮಧುರಾ ಗಾವೋ ಮಧುರಾ ಯಷ್ಟಿರ್ಮಧುರಾ ಸೃಷ್ಟಿರ್ಮಧುರಾ |

ದಲಿತಂ ಮಧುರಂ ಫಲಿತಂ ಮಧುರಂ ಮಥುರಾಧಿಪತೇರಖಿಲಂ ಮಧುರಮ್ || ೮ ||