Tuesday, February 26, 2013

ಶ್ರೀನನ್ದಕುಮಾರಾಷ್ಟಕಮ್


              ಶ್ರೀನನ್ದಕುಮಾರಾಷ್ಟಕಮ್
               (ವಲ್ಲಭಾಚಾರ್ಯಕೃತಂ)
 
ಸುನ್ದರಗೋಪಾಲಂ ಉರವನಮಾಲಂ ನಯನವಿಶಾಲಂ ದುಃಖಹರಮ್
ವೃನ್ದಾವನಚನ್ದ್ರಮಾನನ್ದಕನ್ದಂ ಪರಮಾನನ್ದಂ ಧರಣಿಧರಮ್ |
ವಲ್ಲಭಘನಶ್ಯಾಮಂ ಪೂರ್ಣಕಾಮಂ ಅತ್ಯಭಿರಾಮಂ ಪ್ರೀತಿಕರಮ್
ಭಜ ನನ್ದಕುಮಾರಂ ಸರ್ವಸುಖಸಾರಂ ತತ್ವವಿಚಾರಂ ಬ್ರಹ್ಮಪರಮ್ || ||

ಸುನ್ದರವಾರಿಜವದನಂ ನಿರ್ಜಿತಮದನಂ ಆನನ್ದಸದನಂ ಮುಕುಟಧರಮ್
ಗುಞ್ಜಾಕೃತಿಹಾರಂ ವಿಪಿನವಿಹಾರಂ ಪರಮೋದಾರಂ ಚೀರಹರಮ್ |
ವಲ್ಲಭಪಟಪೀತಂ ಕೃತಉಪವೀತಂ ಕರನವನೀತಂ ವಿಬುಧವರಮ್
ಭಜ ನನ್ದಕುಮಾರಂ ಸರ್ವಸುಖಸಾರಂ ತತ್ವವಿಚಾರಂ ಬ್ರಹ್ಮಪರಮ್ || ||

ಶೋಭಿತಮುಖಧೂಲಂ ಯಮುನಾಕೂಲಂ ನಿಪಟಅತೂಲಂ ಸುಖದತರಮ್
ಮುಖಮಣ್ಡಿತರೇಣುಂ ಚಾರಿತಧೇನುಂ ವಾದಿತವೇಣುಂ ಮಧುರಸುರಮ್ |
ವಲ್ಲಭಮತಿವಿಮಲಂ ಶುಭಪದಕಮಲಂ ನಖರುಚಿಅಮಲಂ ತಿಮಿರಹರಮ್
ಭಜ ನನ್ದಕುಮಾರಂ ಸರ್ವಸುಖಸಾರಂ ತತ್ವವಿಚಾರಂ ಬ್ರಹ್ಮಪರಮ್ || ||

ಶಿರಮುಕುಟಸುದೇಶಂ ಕುಞ್ಚಿತಕೇಶಂ ನಟವರವೇಷಂ ಕಾಮವರಮ್
ಮಾಯಾಕೃತಮನುಜಂ ಹಲಧರಅನುಜಂ ಪ್ರತಿಹತದನುಜಂ ಭಾರಹರಮ್ |
ವಲ್ಲಭವ್ರಜ್ಪಾಲಂ ಸುಭಗಸುಚಾಲಂ ಹಿತಮನುಕಾಲಂ ಭಾವವರಮ್
ಭಜ ನನ್ದಕುಮಾರಂ ಸರ್ವಸುಖಸಾರಂ ತತ್ವವಿಚಾರಂ ಬ್ರಹ್ಮಪರಮ್ || ||

ಇನ್ದೀವರಭಾಸಂ ಪ್ರಕಟಸುರಾಸಂ ಕುಸುಮವಿಕಾಸಂ ವಂಶಿಧರಮ್
ಹೃತಮನ್ಮಥಮಾನಂ ರೂಪನಿಧಾನಂ ಕೃತಕಲಗಾನಂ ಚಿತ್ತಹರಮ್ |
ವಲ್ಲಭಮೃದುಹಾಸಂ ಕುಞ್ಜನಿವಾಸಂ ವಿವಿಧವಿಲಾಸಂ ಕೇಲಿಕರಮ್
ಭಜ ನನ್ದಕುಮಾರಂ ಸರ್ವಸುಖಸಾರಂ ತತ್ವವಿಚಾರಂ ಬ್ರಹ್ಮಪರಮ್ || ||


ಪರಮಪ್ರವೀಣಂ ಪಾಲಿತದೀನಂ ಭಕ್ತಾಧೀನಂ ಕರ್ಮಕರಮ್
ಮೋಹನಮತಿಧೀರಂ ಫಣಿಬಲವೀರಂ ಹತಪರವೀರಂ ತರಲತರಮ್ |
ವಲ್ಲಭವ್ರಜರಮಣಂ ವಾರಿಜವದನಂ ಹಲಧರಶಮನಂ ಶೈಲಧರಮ್
ಭಜ ನನ್ದಕುಮಾರಂ ಸರ್ವಸುಖಸಾರಂ ತತ್ವವಿಚಾರಂ ಬ್ರಹ್ಮಪರಮ್ || ||

ಜಲಧರದ್ಯುತಿಅಙ್ಗಂ ಲಲಿತತ್ರಿಭಙ್ಗಂ ಬಹುಕೃತರಙ್ಗಂ ರಸಿಕವರಮ್
ಗೋಕುಲಪರಿವಾರಂ ಮದನಾಕಾರಂ ಕುಞ್ಜವಿಹಾರಂ ಗೂಢತರಮ್ |
ವಲ್ಲಭವ್ರಜಚನ್ದ್ರಂ ಸುಭಗಸುಛನ್ದಂ ಕೃತಆನನ್ದಂ ಭ್ರಾನ್ತಿಹರಮ್
ಭಜ ನನ್ದಕುಮಾರಂ ಸರ್ವಸುಖಸಾರಂ ತತ್ವವಿಚಾರಂ ಬ್ರಹ್ಮಪರಮ್ || ||


ವನ್ದಿತಯುಗಚರಣಂ ಪಾವನಕರಣಂ ಜಗದುದ್ಧರಣಂ ವಿಮಲಧರಮ್
ಕಾಲಿಯಶಿರಗಮನಂ ಕೃತಫಣಿನಮನಂ ಘಾತಿತಯಮನಂ ಮೃದುಲತರಮ್ |
ವಲ್ಲಭದುಃಖಹರಣಂ ನಿರ್ಮಲಚರಣಮ್ ಅಶರಣಶರಣಮ್ ಮುಕ್ತಿಕರಮ್
ಭಜ ನನ್ದಕುಮಾರಂ ಸರ್ವಸುಖಸಾರಂ ತತ್ವವಿಚಾರಂ ಬ್ರಹ್ಮಪರಮ್ || ||
            

No comments:

Post a Comment