ಗೋಕುಲೇಶಾಷ್ಟಕಮ್

               ಗೋಕುಲೇಶಾಷ್ಟಕಮ್

ನನ್ದಗೋಪಭೂಪವಂಶಭೂಷಣಂ ವಿಭೂಷಣಂ

ಭೂಮಿಭೂತಿಭೂರಿಭಾಗ್ಯಭಾಜನಂ ಭಯಾಪಹಮ್ |

ಧೇನುಧರ್ಮರಕ್ಷಣಾವತೀರ್ಣಪೂರ್ಣವಿಗ್ರಹಂ

ನೀಲವಾರಿವಾಹಕಾನ್ತಿ ಗೋಕುಲೇಶಮಾಶ್ರಯೇ || ೧ ||

ಗೋಪಬಾಲಸುನ್ದರೀಗಣಾವೃತಂ ಕಲಾನಿಧಿಂ

ರಾಸಮಣ್ಡಲೀವಿಹಾರಕಾರಿಕಾಮಸುನ್ದರಮ್ |

ಪದ್ಮಯೋನಿಶಂಕರಾದಿದೇವಬೃನ್ದವನ್ದಿತಂ

ನೀಲವಾರಿವಾಹಕಾನ್ತಿ ಗೋಕುಲೇಶಮಾಶ್ರಯೇ || ೨ ||

ಗೋಪರಾಜರತ್ನರಾಜಿಮನ್ದಿರಾನುರಿಙ್ಗಣಂ

ಗೋಪಬಾಲಬಾಲಿಕಾಕುಲಾನುರುದ್ಧಗಾಯಿನಮ್ |

ಸುನ್ದರೀಮನೋಜಭಾವಭಾಜನಾಮ್ಬುಜಾನನಂ

ನೀಲವಾರಿವಾಹಕಾನ್ತಿ ಗೋಕುಲೇಶಮಾಶ್ರಯೇ || ೩ ||

ಕಂಸಕೇಶಿಕುಞ್ಜರಾದಿದುಷ್ಟದೈತ್ಯದಾರಣಂ

ಇನ್ದ್ರಸೃಷ್ಟವೃಷ್ಟಿವಾರಿವಾರಣೋದ್ಧೃತಾಚಲಮ್ |

ಕಾಮಧೇನುಕಾರಿತಾಭಿಧಾನಗಾನಶೋಭಿತಂ

ನೀಲವಾರಿವಾಹಕಾನ್ತಿ ಗೋಕುಲೇಶಮಾಶ್ರಯೇ || ೪ ||

ಗೋಪಿಕಾಗೃಹಾನ್ತಗುಪ್ತಗವ್ಯಚೌರ್ಯಚಞ್ಚಲಂ

ದುಗ್ಧಭಾಣ್ಡಭೇದಭೀತಲಜ್ಜಿತಾಸ್ಯಪಙ್ಕಜಮ್ |

ಧೇನುಧೂಲಿಧೂಸರಾಙ್ಗಶೋಭಿಹಾರನೂಪುರಂ

ನೀಲವಾರಿವಾಹಕಾನ್ತಿ ಗೋಕುಲೇಶಮಾಶ್ರಯೇ || ೫ ||

ವತ್ಸಧೇನುಗೋಪಬಾಲಭೀಷಣಾಸ್ಯವಹ್ನಿಪಂ

ಕೇಕಿಪಿಞ್ಛಕಲ್ಪಿತಾವತಂಸಶೋಭಿತಾನನಮ್ |

ವೇಣುನಾದಮತ್ತಘೋಷಸುನ್ದರೀಮನೋಹರಂ

ನೀಲವಾರಿವಾಹಕಾನ್ತಿ ಗೋಕುಲೇಶಮಾಶ್ರಯೇ || ೬ ||

ಗರ್ವಿತಾಮರೇನ್ದ್ರಕಲ್ಪಕಲ್ಪಿತಾನ್ನಭೋಜನಂ

ಶಾರದಾರವಿನ್ದಬೃನ್ದಶೋಭಿಹಂಸಜಾಗತಮ್ |

ದಿವ್ಯಗನ್ಧಲುಬ್ಧಭೃಙ್ಗಪಾರಿಜಾತಮಾಲಿನಂ

ನೀಲವಾರಿವಾಹಕಾನ್ತಿ ಗೋಕುಲೇಶಮಾಶ್ರಯೇ || ೭ ||

ವಾಸರಾವಸಾನಗೋಷ್ಠಗಾಮಿಗೋಗಣಾನುಗಂ

ಧೇನುದೋಹದೇಹಗೇಹಮೋಹವಿಸ್ಮಯಕ್ರಿಯಮ್ |

ಸ್ವೀಯಗೋಕುಲೇಶದಾನದತ್ತಭಕ್ತರಕ್ಷಣಂ

ನೀಲವಾರಿವಾಹಕಾನ್ತಿ ಗೋಕುಲೇಶಮಾಶ್ರಯೇ || ೮ ||

           ***